Antes harii uma kbiit-laek, Governu konsulta entidade relevante
DILI, 27 janeiru 2021 (TATOLI)–Ministru Administrasaun Estatál (MAE), Miguel Pereira de Carvalho hateten antes harii uma ba kbiit-laek, Governu liuhusi Ministériu Administrasaun Estatál (MAE) sei envolve entidade hotu-hotu hodi halo konsultasaun.
“Ami sei envolve setór oin-oin hanesan veteranu sira, sosiedade sivíl en-jerál no líder komunitáriu hodi husu sira-nia konsultasaun,” nia dehan ba jornalista sira iha Palásiu Governu, kuarta ne’e.
Nia tenik, uma ba kbiit-laek ne’ebé atu harii hamutuk 1.272 no kada suku sei harii uma tolu.
“Ita tenke halo ho fazeadamente. Programa ne’e tama bá iha suku hotu-hotu. Ita bá tama iha suku ida, kada aldeia bele halo uluk uma tolu,” Miguel esplika.
Tuir governante ne’e katak totál orsamentu ba harii uma kbi’it-laek ne’e hamutuk millaun $21.
“MAE sei aloka orsamentu ne’e ba iha sekretariadu PNDS hodi jere, depois xefe suku no populasaun mak sei halo identifikasaun ba nia komunidade rasik. Sira ne’ebé kbiit-laek duni mak bele hetan uma ne’e,” nia informa.
Miguel hateten, fulan rua tan MAE sei transfere osan ne’e bá iha suku hodi hahú haree no implementa programa refere.
Jornalista: Natalino Costa
Editór: Xisto Freitas
