DILI, 04 fevereiru 2021 (TATOLI)–Diretór Ezekutivu Servisu Rejistu no Verifikasaun Emprezariál (SERVE), Florêncio Sanches, informa durante Estadu Emerjénsia (EE) dahaluk to’o da-sanulu konsege rejista empreza estrajeiru internasionál no nasionál balun ne’ebé taka kompañia tanba impaktu menus rendimentu.
“To’o fulan-dezembru tinan kotuk, pedidu ita taka kompañia hamutuk 64. Sira taka permanente ona labele loke filafali kompañia. Kuandu taka ne’e signifika hamate ona kompañia tanba lei la permite atu hamoris, kuandu hamoris fali ho naran seluk,” Diretór Ezekutivu SERVE hateten iha Fatuhada, kinta ne’e.
Husi númeru ne’e, empreza internasionál 90% no nasionál 10% mak deside taka.
“Ita komprende katak sira laiha lukru no sira iha problema ho rendimentu,” nia akresenta.
Iha sorin seluk, nia parte sente triste tanba empreza timor-oan ne’ebé maka deside.
“Ita maka uma-na’in, rai-na’in, no sidadaun ba nasaun ida-ne’e maibé ita taka fali. Tanba ne’e, SERVE apela ba komunidade emprezariál iha territóriu tomak, tantu nasionál no internasionál atu labele taka kompañia, maibé bele taka de’it sira-nia atividade temporáriu no pauza atividade, husik kompañia moris nafatin to’o situasaun filafali ba normál maka aitividade kontinua,” nia fó hanoin.
Diretór ne’e sujere, karik muda de’it atividade kompañia, ne’ebé uluk fa’an tomate la folin karik bele fa’an fali sapatu, tanba lei fó dalan.
“Ida-ne’e maka sira presiza hatene tanba durante ne’e taka kompañia no atividade,” Florêncio Sanches hatutan.
Iha fulan agostu to’o setembru 2020, SERVE rejista kompañia 200-resin maka taka kompañia no atividade negósiu.
“Ida-ne’e númeru ne’ebé signifikante tebes maski iha tempu pandemia, kompañia sira labele dezesperadu atu halo atividade komérsiu,” nia subliña.
Jornalista: Natalino Costa
Editora: Julia Chatarina
