Agostinho fa’an nuu sustenta família

DILI, 09 fevereiru 2021 (TATOLI)-Agostinho da Silva husi Munisípiu Baucau, Postu Administrativu Baguia hala’o atividade negósiu liuhusi fa’an nuu iha dalan ninin hodi sustenta família uma laran inklui ajuda alin sira ba eskola. Atividade ne’e nia hala’o ona dezde 2019 to’o ohin loron.
Notísia Relevante: Negosiante Obralan Ai-mutin Sei Hamamuk Fatin
“Loron ida ami hetan rendimentu $7-10. Tanba situasaun Covid-19, ami hetan rendimentu menus la hanesan tempu uluk ne’ebé mak COVID-19 seidauk tama,” Negosiante Ambulante, Agostinho da Silva haktuir ba Agência TATOLI iha Jardin Motael, Dili, tersa ne’e.
Nune’e mós, Alfredo Domingos da Costa, Vendedór Ambulante ida mós, akresenta katak nia fa’an nuu hodi sustenta moris. Rendimentu husi fa’an nuu ne’e loron ida nia hetan entre $10 no $20. “Kuandu ema la iha ne’e ami hetan $2”.
Nia hatutan: “Ami-nia moris mak nune’e; hodi dudu labarik sira ba eskola. Fa’an nuu atu ajuda mós familia sira”.
Fatin limitadu
Vendedór ambulante sira preokupa ho limitasaun espasu hodi bele hala’o sira-nia atividade ekonómika. Fatin ne’ebé antes ne’e Governu oferese iha Largo Lecidere maibé limitadu.
“Governu tau fatin ne’ebé di’ak ba ami hanesan mós kolega sira-ne’ebé fa’an iha Largo. Tanba fatin sira-ne’ebé Governu prepara ona iha Jardin Largo ne’e sira fa’an, tuur metin, maibé Ekipa Vijilánsia duni ami tuun sa’e. Ami pasiénsia fa’an nafatin,” Agostinho da Silva halo komparasaun.
Ho situasaun no kondisaun ida-ne’e, vendedór ambulante ne’e espera katak Governu bele oferese mós fatin di’ak hanesan mós vendedór ambulante seluk iha Largo Lecidere.
“Espera iha tempu oin mai Governu bele tau importánsia ba negosiante sira-ne’ebé mak fa’an nuu iha dalan ninin,” nia reforsa.
Entretantu, kona-ba fatin, tuir Alfredo Domingos da Costa, ne’ebé oras ne’e daudaun hala’o hela nia atividade negósiu iha Largo Lecidere ne’e konsidera katak konfortável ba sira.
“Fatin ne’e di’ak uitoan tanba fa’an ho hakmatek,” nia rekoñese.
Notísia Relevante: Jestaun Merkadória kontrola nafatin negosiante faan sasán iha trotoar leten
Jornalista: Osória Marques
Editór: Cancio Ximenes

