DILI, 15 fevereiru 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo sei halo esplikasaun ba deputadu-sira iha Parlamentu Nasionál (PN) kona-bá prosesu simu estudante foun atu asesu ba Universidade Nasionál Timor Lorosa’e (UNTL) no Institutu Politékniku Betano (IPB).
“Enkontru líder bankada iha semana oin ha’u sei infroma fila-fali ba sira, tanba antes ne’e ita halo ona esplikasaun iha PN no haruka-tan karta ba sira,” Francisco Jerónimo hateten ba jornalista Agência Tatoli iha Palásiu Governu, segunda (15/02).
Notísia Relevante:PN husu MESSK klarifika mekanizmu selesaun estudante foun ba UNTL
Governante ne’e informa kedan katak, esplikasaun ne’ebé sei hato’o ba deputadu sira la diferente hosi esplikasaun Ministru Ensinu Superiór Siénsia no Kultura (MESSK) Longuinhos dos Santos.
“Estudante sira ho valór bo’ot hili kursu medisina jéral maibé ninia vaga limitadu. Sira ho valór bo’ot la liu tanba kestaun limitasaun vaga. Ida ne’e tanba sistema mak regula. Iha mós opsaun ba estudante sira atu hili. La hatene sira halo ida ne’e ka la’e,” MAPKOMS subliña.
Maski nune’e MAPKOMS konsidera preokupasaun deputadu sira-nian pertinente duni no sempre prontu atu halo esklaresimentu ba kualkér asuntu ne’ebé sai preokupasaun PN.
Antes ne’e Deputadu António da Conceição ho Deputadu David Dias Xiemenes ‘Mandati’ husu Governu liuhosi Ministru Ensinu Superiór Siénsia no Kultura (MESSK) atu halo klarifikasaun ba públiku kona-bá prosesu selesaun ba estudante foun ne’ebé asesu ba UNTL no IPB.
Deputadu sira husu ne’e tanba estudante balun ho valór boot maibé la admitidu kompara ho sira ne’ebé valór kiik.
Kona-bá ne’e parte Komisaun Asesu Engresu Ensinu Superiór (KAEES) klarifika ona katak, estudante barak ho valór boot entre 50 to’o 54 la admitidu tanba lakon iha opsaun kursu ne’ebé sira rasik hili.
Entretantu estudante rejimi jerál no rejimi espesiál ne’ebé admitidu atu asesu ba Ensinu Superiór Públiku UNTL no IPB ba tinan akadémiku 2021 hamutuk 5.582.
Prosesu asesu Ensinu Superiór Públiku ba estudante foun tinan akadémíku 2021 bazeia ba diploma Ministeriál númeru 32/2020, 16 setembru.
Notísia Relevante:Estudante ho valór boot lakon iha opsaun hili kursu UNTL
Jornalista: Tomé Amado
Editór: Cipriano Colo
