DILI, 18 fevereiru 2021 (TATOLI)—Ministériu Edukasaun Joventude no Desportu (MEJD) kontinua reforsa edukasaun Ensinu Pré-Eskolár (EPE) ho programa ‘Halimar, Aprende no Deskobre Susesu’ (HANDS) ne’ebé hetan apoiu hosi Ministériu Administrasaun Estatál (MAE), New Zealand Aid Programme (NZAID) no Australian Aid Programme (AUSAID).
Vise-Ministru Edukasaun Joventude no Desportu (MEJD), António Guterres konsidera programa HANDS sei tulun labarik-sira bele prepara aan ho diak hodi dezenvolve sira-nia kapasidade bainhira hakat ba nível edukasaun tuir-mai.
“Governu iha programa ida hanaran HANDS ne’ebé estabelese ona iha Munisípiu sira hodi fó apoiu ba labarik-sira bele dezenvolve sira-nia kapasidade,” António Guterres hateten ba jornalista sira hafoin partisipa semináriu avaliasaun ba programa HANDS iha Sentru Formasaun Tibar, kinta (18/02).
Nia esplika, programa ne’e implementa ona durante tinan lima no oras ne’e responsabiliza hosi MEJD ho MAE atu fó atensaun másimu hodi hadia liu tan fasilidade iha Ensinu Pré Eskolár.
Polítikamente nia dehan, Governu tenki investe makaas liu tan iha área Edukasaun tanba atu forma ema sai ema no prepara ema ba futuru ne’ebé diak tenki hahú hosi Ensinu Pré-Eskolár.
Oras ne’e daudaun Ensinu Pré-Eskolár ne’ebé hetan ona akreditasaun hamutuk 299 iha territóriu tomak.
Kona-bá preparasaun fasilidade ba Ensinu Pré-Eskolár responsabiliza hosi MAE liu hosi Projetu Nasionál Dezenvolvimentu Suku (PNDS) no MEJD mak halo supervizaun inklui monitorizasaun ba kualidade tuir Dekretu-Lei númeru 3/2016.
Tuir dadus hosi MEJD katak desde hahú mandatu VIII Governu Konstitusionál to’o ohin-loron, MAE hamutuk ho parseiru dezenvolvimentu Governu Nova Zelándia, tulun ona hodi harii Fatin-Halimar (Play Ground) ba nível Ensinu Pré-Eskolár iha Timor-Leste hamutuk 76.
Jornalista: Tomé Amado
Editór: Cipriano Colo
