Família matebian MCS konkorda halo autópsia ba mate-isin
DILI, 19 fevereiru 2021 (TATOLI) – Família matebian ho inisiál MCS konkorda ona atu Polísia Forensik halo autópsia ba mate-isin MCS nian ne’ebé oras ne’e iha hela Ospitál Nasionál Guido Valadares (HNGV).
Matebian MCS mate mistériu iha apartamentu ida iha area Hudi-Laran, Dili, iha loron 17 fevereiru, foin lalais ne’e. Família aseita halo autópsia ba mete-isin hodi bele hatene kauza loloos hosi matebian nia mate ne’e.
Notísia Relevante : Mate mistériu, Polísia Forensik hein desizaun família atu halo autópsia
Komandante Polísia Forensik, Inspetór Aquiles Sarmento Varela, sesta ne’e, informa ba Agência TATOLI via telefone katak nia-parte simu ona informasaun hosi família matebian MCS ne’ebé konkorda atu halo autópsia ba mate-isin. Ho nune’e, Polísia Forensik termina ona, segunda (22/02), tuku 09: 00 Otl, submete mate-isin ba prosesu autópsia.
Nia dehan, horisehik no ohin, labele halo autópsia tanba doutór espesialista sei hala’o hela autópsia ba mate-isin ida hosi Oe-Cusse.
“Ha’u mós orasida sei ba foti mandadu autópsia nian hosi Ministériu Públiku,” informa Inspetór Aquiles Sarmento Varela.
Jornalista : Domingos Piedade Freitas
Editór : Francisco Simões
