Horta mehi harii institutu Xadrez iha TL
DILI, 23 fevereiru 2021 (TATOLI)—Eis Prezidente Repúblika, José Manuel Ramos Horta, iha mehi atu harii institutu Xadrez iha Timor-Leste (TL) tanba konsidera hanesan jogu intelektuál-ida ne’ebé bele dezenvolve labarik sira-nia kakutak.
“Ha’u-nia mehi atu iha institutu Xadrez ida iha TL, tanba ha’u haree jogu ne’e hanesan jogu intelektuál duni. Di’ak tebes ba jerasaun foun-sira atu dezenvolve sira-nia kakutak. Jogu estratéziku no tátiku,” Horta hateten ba jornalista-sira hafoin sai oradór iha orientasaun estudante foun Universidade da Páz, tersa ne’e.
Horta mós hasoru-malu ona ho kampeaun mundiál Xadrez, Garry Kimovich Kasparov, iha Norwegia no husu atu fó apoiu hodi loke institutu Xadrez iha TL.
“Kasparov-rasik promete atu iha fulan juñu tinan-ne’e vizita TL hodi ko’alia liu-tán kona-bá asuntu ne’e,” Horta haktuir.
Iha fatin hanesan Reitór UNPAZ, Adolmando Amaral konsidera mehi José Ramos Horta-nian atu harri institutu Xadrez ne’e pertinente duni tanba jogu ne’e di’ak hodi ajuda tebes ema-ninia kakutak.
UNPAZ-rasik konsege realiza ona jogu Xadrez, iha komemorasaun Dies Natalis Universidade-nian iha nível fakuldade no tuir planu sei kontinua realiza torneiu iha futuru.
Xadrez nu’udár jogu ida ne’ebé hala’o hosi ema na’in-rua iha tabuleiru kuadradu ne’ebé fahe ba kaixa hamutuk 64 ho-nia pesa hamutuk 32.
Jornalista: Tomé Amado
Editór: Cipriano Colo
