Padre Locatelli konstrui kampu multifunsaun ba Suku Uaimori

VIKEKE, 04 Agostu 2026 (TATOLI)—Xefe Suku Uaimori, Postu Vikeke Vila, Munisípiu Vikeke, Francelino António Gomes, hateten Padre Elígio Locatelli, SDB, ho inisiativa konstrui kampu multifunsaun ida ba komunidade Suku Uaimori atu joven sira uza ba atividade desportiva.

“Kampu multifunsaun ne’ebé daudaun konstrui iha ami-nia Suku Uaimori ne’e hetan apoia husi husi Pe. Locatelli. Nia mak buka fundu hamutuk rihun $25 hodi apoia ba ami konstrui kampu ida-ne’e iha Suku Uaimori,” Francelino ba TATOLI iha Postu Vikeke Vila, Tersa ne’e.

Autoridade ne’e subliña konstrusaun kampu multifusaun ne’e komunidade Uaimori hamutuk ho autoridade sira mak konstrui rasik tanba la’ós projetu. Konstrusaun daudauk ne’e foin hada fondasi hale’u kampu. Fondasi ramata sei ateru no sei konstrui mós sanitária (sintina) unidade neen.

“Padre apoia fundu ami mak servisu halo konstrusaun hahú iha fulan-Jullu 2026. Kona-ba medida kampu multifunsaun 28m x 15m uza ba basketball, volleyball no futsál, lokaliza besik kapela Uaimori,” Francelino esplika.

Nia dehan, bainhira kampu ne’e konklui, Autoridade Suku Uaimori hamutuk ho juventude sei loke turneiu ba joven sira iha suku.

“Durante ne’e, ami iha kampu futeból boot maibé joven sira ladún uza. Entaun, ho kampu multifunsaun ne’e ha’u sente joven sira sei kriativu liután ba desportiva no promove ita-nia joven sira-nia talentu no redús problema sira iha suku,” nia hato’o.

Francelino haktuir durante ne’e Pe. Locatelli hala’o servisu iha Suku Uaimori apoia tebes komunidade, tan ne’e sira hato’o agradesimentu ba Amu ne’e tanba apoia ba dezenvolvimentu iha suku inkui kapela Uaimori.

Tuir dadus, populasaun Suku Uaimori iha aldeia neen (6) mak hanesan Aldeia Uma Liurai, Uma Boo, Uaibubu, Lu-Lei, Uatu-Lesu no Mea-Uain, ho total populasaun hamutuk 1.142, kompostu husi feto na’in-564 no mane na’in-578 husi uma-kain 242.

Jornalista: Vitorino Lopes da Costa

Editór: Xisto Freitas da Piedade