Governu apoia konstrusaun kapeliña iha HoREX Baukau

BAUKAU, 04 Agostu 2026 (TATOLI)–Governu liuhusi Ministériu Planeamentu Investimentu Estratéjiku (MPIE) apoia orsamentu hodi konstrui Kapela Nossa Senhora de Lourdes iha Ospitál Rejionál Eduardo Ximenes (HoREX-sigla portugeza) Baukau.
Prezidente Autoridade Munisipál (PAM) Baukau, Veneranda Eurico Lemos Martins, hato’o agradesimentu ba Governu sentrál liuhusi MPIE ne’ebé responde hodi konstrui kapeliña, no ne’e sai fatin lulik ba mediku, profisiónal saúde, pasiente no família sira hodi hetan esperansa ba vida espirituál.
“Kapeliña ne’e sai espasu ba familia sira-ne’ebé sente lakon esperansa, sai mós fatin konsolasaun ba médiku sira,” Prezidente Autoridade Munisipál Baukau hateten iha resintu HoREX, Vila Nova, Baukau, Tersa ne’e.
Eis deputada ne’e relata kapeliña ne’e mós sei sai fatin sagradu ba sidadaun sira-ne’ebé buka Maromak hodi hetan milagre nune’e husu ba kompañia atu konstrui projetu referidu ho responsabilidade atubele ramata tuir kontratu ne’ebé estabelesidu.
Aleinde ne’e, husu ba tékniku liuliu pesoál Ajénsia Dezenvolvimentu Nasionál (ADN) atu nafatin kontrola obra referida hodi garante kualidade.
“Husu parte hotu-hotu atu kolabora nune’e konstrusaun ida-ne’e bele hala’o ho lalais,” Veneranda Lemos akresenta.
Iha fatin hanesan, Diretór Ezekutivu HoREX Baukau, Claudino Ximenes relata prosesu konstrusaun ba kapeliña referida hahú bainhira parte HoREX hato’o pedidu verbál ba MPIE, iha-ne’ebé hetan resposta liuhusi levantamentu dadus no ohin halo lansamentu fatuk dahuluk ne’ebé konsideradu importante ba vida espirituál.
“Ami hato’o agradesimentu ba ministériu relevante tanba ohin ita lansa ona obra ne’e. Espera fulan-ualu mai ita bele haree ona rezultadu,” Claudino Ximenes hateten.
Nia konsidera kapeliña ne’e importante ba funsionáriu, pasiente no família sira tanba aleinde esforsu liuhusi médiku, maibé presiza mós kondisaun nune’e hato’o ba Maromak hodi tulun iha vida espirituál.
Serimónia hatuur fatuk dahuluk ba projetu referidu ne’e husi Prezidente Autóridade Munisipál (PAM) Baukau, Veneranda Eurico Lemos Martins ne’ebé partisipa husi Komadante Polísia Nasionál Timor-Leste (PNTL) Baukau, Superintendente Xefi João Sancho Pires, Dirijente Dioseze Baukau no funsionáriu HoREX Baukau.
Entretantu, projetu konstrusaun Kapela Nossa Senhora de Lourdes HoREX finansia husi MPIE ho montante orsamentu hamutuk $96.252,30 ne’ebé responsabiliza husi Kompañia Delatina Unipessoal, Lda ho durasaun kontratu fulan-ualu ne’ebé sei termina iha fulan-Marsu 2027.
Jornalista: Natalino Belo
Editór: Xisto Freitas da Piedade

