DILI, 01 marsu 2021 (TATOLI)—Parlamentu Nasionál husu Governu liuhosi Ministériu Edukasaun, Juventude no Desportu (MEJD) atu suspende atividade eskolár iha Munisípiu Covalima.
Notísia Relevante: PN husu MEJD hasai desizaun ba atividade eskolár iha Bobonaro-Covalima
Deputadu Bankada Partidu Demokrátiku (PD), Adriano do Nascimento, hateten propagasaun surtu ne’e eziste tanba movimentasaun tanba ne’e suspende atividade eskolár iha Covalima.
“Ha’u rona COVID-19 ne’e kona estudante ida, tanba ne’e ha’u husu bainhira mak suspende atividade eskolár iha Covalima, merkadu no mós funsionáriu Estadu nian,” Deputadu Adriano dos Nascimento, informa liuhosi debate estensaun Estadu Emerjénsia XI, iha plenária Parlamentu Nasionál, segunda ne’e.
Nune’e mós Deputadu Abel Pires husu Governu atu foti desizaun suspende ona atividade eskolár iha Covalima, nune’e bele hamate propagasaun surtu COVID-19 ne’e.
“Ha’u husu suspende atividade eskolár no atividade sira seluk iha-ne’ebá tanba atividade sira-ne’e mak sai sentru atu propagasaun ne’e la’o nafatin,” Deputadu Bankada Partidu Libertasaun Populár ne’e nu’udar mós Covalimaoan fó hanoin ba MEJD.
Reprezentante Povu ne’e husu Ministériu Edukasaun, Juventude no Desportu, atu foti ona desizaun hodi suspende atividade eskolár ne’e nune’e ekipa saúde hala’o servisu.
Notísia Relevante: MKAE orienta CLN prepara distribuisaun foos ba Covalima-Bobonaro
Jornalista: Evaristo Soares Martins
Editór: Cancio Ximenes
