LIQUIÇA, 16 marsu 2021 (TATOLI) – Negosiante sira iha Merkadu Munisipiu Liquiça husu ba autoridade seguransa iha Postu Polísia Tibar atu bele fó tratamentu iguál ba abitante sira hotu.
Dulce Boavida Soares, nu’udar negosiante hateten, nia parte triste haree pesoál membru polísia balun bele autoriza indivíduu balun tama-sai Dili-Liquiça liuhosi Postu Polísia Tibar, maibé ba negosiante sira ne’ebé atu fa’an sira-nia modo-tahan ho ai-fuan ba Merkadu Dili labele fali.
Notísia Relevante : Modo-tahan ho ai-fuan dodok iha merkadu
“Ami triste tebes tanba membru Polísia balun destaka iha Postu Polísia Tibar taka dalan ba ema hotu labele tama ba Dili, maibé ami haree sira fó tratamentu ba abitante sira la hanesan. Sira la bele husik ami negosiante tama ba Dili, mas ema seluk ami haree sira bele husik tama fali ba Dili,” Dulce Boavida Soares, haktuir ba Agência Tatoli iha Merkadu Liquiça, tersa ne’e.
Dulce Boavida Soares rasik haree ho matan bainhira negosiante seluk tula modo, lori tua-sabu no mina-rai hosi Maliana, Bobonaro no negosiante balun hosi Ermera bele husik tama ba Dili, maibé polísia labele husik liu nia ho nia maluk negosiante sira atu ba fa’an modo-tahan ho ai-fuan iha Dili.
“Ha’u rasik haksesuk malu ho pesoál PNTL sira iha Postu Polísia Tibar no iha oknum polísia balun hasai lia-fuan la edukativu hasoru ha’u feto faluk ne’e,” Dulce Boavida Soares haktuir.
Iha haksesuk malu ho polísia ne’e, Dulce Boavida Soares, lia-tun ba polísia sira atu bele fó oportunidade hanesan ba abitante hotu no husu atu Polísia bele asegura sira tama ba Dili hodi fa’an hotu tiha modo-tahan no ai-fuan sira ne’e mak fila-fali ba Liquiça tanba modo-tahan ho ai-fuan sira bele dodok de’it bainhira ema la sosa.
“Ami la hatene, ami nia família rasik balun hela iha Dili, mais kada loron nia sai tama Liquiça di’ak hela mai sosa ami nia modo-tahan, malus no ai-fuan hodi lori ba fa’an iha Dili. La hatene sira mai ne’e oinsá mak Polísia bele hatán. Sé uza surat ruma mak ba-mai pelumenus ajuda ami para ami ba trata hodi fasilita lori ami nia produtu sira ne’ebé ami sosa ona ne’e ba Dili, modo no ai-fuan barak mak agora dodok loos ona, ami lakon maka’as loos,” Dulce hateten ho matan-been.
Komandu PNTL Liquiça seidauk simu informasaun
Agência Tatoli halo konfirmasaun ba Adjuntu Komandante PNTL Munisípiu Liquiça Superintendente Asistente Graciano Amaral, kona-ba lamentasaun negosiante Dulce nian ne’e no Superintendente Asistente Graciano Amaral, afirma katak iha aplikasaun serka sanitária la permite abitante sira atu tama ba Dili. Exeptu iha orden hosi autoridade Sentru Integradu Jestaun Krize (CIGC) ka autoridade kompetente sira.
Kona-ba membru Polísia balun ne’ebé husik liu negosiante seluk tanba iha indikasaun favoritizmu, Superintendente Asistente Graciano Amaral, hateten to’o agora nia seidauk simu informasaun ne’e no hosu ba negosiante sira iha evidénsia bele hatama keixa ba Komandu PNTL Liquiça atu loke prosesu ho baze regulamentu interna PNTL nian.
“Ami de’it la haree ho matan sira ne’ebé tama-sai ne’e mak ida ne’ebé, karik negosiante sira hatene ema tama-sai bele fó hatene para ita buka tuir tanba ita lakohi COVID-19 iha Dili da’et fali mai Liquiça,” Superintendente Asistente Graciano Amaral afirma.
Kona-ba negosiante balun hosi Bobonaro ho Ermera fasil tama ba Dili liuhosi Postu Polísia Tibar, Graciano Amaral promete sei verifika informasaun ne’e no karik komunidade iha evidénsia bele ajuda Komandu PNTL Liquiça hodi halo investigasaun ba membru polísia sira iha Postu Polísia Tibar.
Jornalista : Hortencio Sanchez
Editór : Francisco Simões
