DILI, 16 marsu 2021 (TATOLI)—Rezultadu teste swab ne’ebé hala’o hosi Sentru Integradu no Jestaun Krize (CIGC-sigla portugés) iha loron loron 9-10 fulan-marsu ba deputadu no funsionáriu sira iha Parlamentu Nasionál maioria negativu.
Notísia Relevante: Ohin, ekipa MS halo teste swab ba deputadu sira iha PN
Sentru Integradu ba Jestaun Krize informa rezultadu teste ne’e ba Parlamentu Nasionál iha loron 15 marsu 2021, tuku 15.30 lorokraik.
“Jeralmente Prezidente Parlamentu Nasionál pronúnsia ona katak laiha ida mak pozitivu entaun hotu-hotu negativu. Ne’e graças a deus maibé ita tenke kontinua dixiplina tanba teste swab ne’e hanesan teste de’it, ne’e la’ós vasina be ita dehan negativu ona, ita bele la’o livre ona,” Vse-Prezidente Parlamentu Nasionál, Deputada Maria Angelina Lopes Sarmento, informa ba Agência TATOLI, iha resintu Parlamentu Nasionál, tersa ne’e.
Nia esplika, estatutu saúde ema-nian bele muda ba pozitivu bainhira la disiplina iha medida prevensaun sira hanesan uza maskára, prátika distansiamentu sosiál no fase liman beibeik ho sabaun.
Ho rezultadu ne’e, Deputada Bankada Partidu Libertasaun Populár (PLP), Domingas dos Santos, kontente nune’e aban bele hahú fali plenária.
“Se dehan parlamentu maioria negativu entaun aban ami hahú fali plenária maibé nafatin kumpre medida prevensaun sira tuir orientasaun Prezidente Parlamentu Nasionál nian,” Deputada PLP ne’e informa.
Antes ne’e, Vise-Sekretáriu Meza Parlamentu Nasionál, Deputadu António Nobre Tilman, informa Ministeriu Saúde atu anunsia ona rezultadu hosi teste swab ba deputadu no funsionáriu Parlamentu Nasionál nian tanba besik ona semana ida.
“Daudaun ne’e ami mós ejize hela, tanba saida mak semana ida ona, rezultadu teste swab seidauk iha,” Vise-Sekretáriu Meza Parlamentu Nasionál, Deputadu António Nobre Tilman, informa liuhosi konferénsia imprensa, iha Parlamentu Nasionál, segunda dadeersan molok CIGC haruka karta rezultadu ba Parlamentu Nasionál.
Jornalista: Evaristo Soares Martins
Editór: Cancio Ximenes
