Bankada CNRT preokupa ho saldo konta tezouru
DILI, 17 marsu 2021 (TATOLI)—Bankada Congresso Nacional de Reconstrução de Timorense (CNRT) preokupa ho saldo konta tezouru Governu nian ne’ebé oras ne’e hela de’it millaun $59,7.
Notísia Relevante: Konta tezouru millaun $266 sufisiente atende despeza trimestre dahuluk
Deputada Bankada CNRT, Carmelita Caetano Moniz, monitoriza liuhosi portál transparénsia ezekusaun orsamentál atinje ona 19.5% reprezenta montante osan hamutuk $465,318,411.63 hosi Orsamentu Jerál Estadu (OJE) 2021 totál hamutuk $1,895,000,000.00.
Deputada Bankada CNRT ne’e haktuir, iha loron 05 janeiru 2021, Ministru Finansa Rui Gomes dehan saldo tezouro (líquidez-likuiditas) totál osan hamutuk $325,000,000.00 mak sei iha saldo hodi bele selu nesesidade kurtu-prazu nian, inklui deve sira.
Iha loron 23 fevereiru 2021, tuir informasaun hosi Banku Sentrál Timor-Leste (BCTL-sigla portugés) katak transfere ona osan Fundu Petrolíferu hamutuk $200,000,000.
Eis Prezidente Komisaun A ne’e dehan, totál osan loloos hahú hosi fulan-janeiru to’o marsu 2021 depois konta ho levantamentu iha tinan 2021 hamutuk $525,000,000.
Maibé Bankada CNRT haree hosi ezekusaun to’o loron 17 marsu gasta ona osan hamutuk $465,318,411.63.
“Signifika ita-nia líquidez (saldu agora) hela de’it $59,681,588.37 (miliaun $59,7). Sera ké iha fulan-marsu 2021 ida-ne’e seidauk iha nesesidade atu halo levantamentu foun ba Fundu Petrolíferu ba OJE 2021. Tanba ita-nia saldo agora hela de’it Miliaun $59,7,” Deputada Carmelita Caetano Moniz, ko’alia iha Parlamentu Nasionál, kuarta ne’e.
Konforme prátika di’ak kontabilístika internasionál no Governu Timor-Leste uluk kedan implementa ida-ne’e, orsamentu tranzita hosi tinan pasadu nian tenke rai millaun $200 ba iha saldo konta tezouru hodi asegura rezerva iha próxima tinan nian. Osan ne’e saldo báziku ba ita-nia kaixa tezouru tenke iha miliaun $200.
Nune’e bainhira osan menus ona hosi millaun $200, Governu tenke husi BCTL atu transfere osan hosi Fundu Petrolíferu ba iha kaixa tezouru nian.
Hatán ba preokupasaun ne’e, Prezidente Komisaun C (Finansa Públika), Deputada Maria Angélica Rangel, esplika Governu foin halo levantamentu iha 23 fevereiru ho montante millaun $200.
“Ita-nia saldo iha tezouru ho atualizadu millaun $321,2 hosi montante biliaun $1.895 ne’ebé mak Parlamentu Nasionál aprova, no oras ne’e Governu ezekuta ona iha primeiru trimestre millaun $284 ho persentajen ezekusaun 19.5%. Signifika orsamentu sei sufisiente hela. Ohin, bankada opozisaun ne’e foti dadus hosi ne’ebé,” Prezidente Komisaun C ne’e fundamenta.
Jornalista: Evaristo Soares M
Editór: Cancio Ximenes
