DILI, 19 marsu 2021 (TATOLI)-Komandu Jerál Polísia Nasionál Timor-Leste (PNTL) orienta ona Polísia Nasionál Unidade Tránzitu hodi halo operasaun rigorozu iha kapitál Dili.
Orientasaun Komandu Jerál PNTL nian ne’e tanba tuir observasaun autoridade sira-nian katak mezmu aplikasaun serka sanitária no konfinamentu vigora hela, maibé movimentu ema nian ho transporte aumenta maka’as hosi loron ba loron.
Notísia Relevante : COVID-19: pozitivu foun 13 hosi Dili-Viqueque, baixa 119
Polísia Tránzitu Nasionál ho operasaun konjunta hamutuk ho Unidade Polísia Tránzitu Munisipiu Dili, polísia eskuadra sira sei hala’o atividade operasaun ne’e ho ativu kobre iha fatin haat iha area Dili laran iha tempu loron no kalan.
“Ami simu ona orientasaun komandu jerál nian hahú sesta ne’e, tuku 2:00 ka tuku 3:00 loraik, sei hahú halo operasaun ida rigorozu iha kapitál Dili,” Komandante Tránzitu Munisípiu Dili, Inspetór Domingos Sarmento, informa ba Agência Tatoli iha Komandu PNTL Munisípiu Dili.
Nia dehan, bá abitante sira ne’ebé atu ba sosa ai-moruk karik fila tenke aprezenta nota ka reseita ruma, se laiha mak operasaun identifika haruka fila no aplika sansaun no ba funsionáriu públiku no traballadór empreza privadu sira tenke aprezenta karta autorizasaun ka guia de marsa.
“Ita haree iha serka sanitaria semana dahuluk ema hotu kumpre hakmatek, maibé agora movimentu komesa aumenta tanba ne’e ita sei la tolera ba abitante ne’ebé la kumpre mak sei aplika sansaun hanesan lei,” Inspetór Domingos Sarmento hateten.
Jornalista : Nelson de Sousa
Editór : Francisco Simões
