DILI, 19 marsu 2021 (TATOLI)-–Autoridade Nasionál Petróleu no Minerál (ANPM) pra-kualifika ona empreza internasionál hamutuk 10-resin mak iha ona interese no foti ona dokumentu nesesáriu atu konkorre ba konkursu públiku petróleu no gás iha bloku 18, kompostu hosi 11 iha tasi-laran no hitu iha rai-maran.
“Promosaun bloku 18 ne’e la’o hela no ita sei taka konkursu públiku ne’e iha loron 01 outubru 2021, maibé daudaun iha ona kompañia 10-resin mak agora pra-kualifika ona hodi bele elijível tuir konkursu, inklui operadór ezistente sira no iha mós kompañia balun espresa interese hodi asesu dadus ne’ebé ita publika online,” Diretór Esplorasaun no Promosaun ANPM, Mateus da Costa, informa ba Agência TATOLI, via telefónika, sesta ne’e.
Notísia relevante: Outubru 2021, Timor-Leste taka konkursu públiku petrolíferu iha bloku 18
Tuir Diretór ne’e, entre kompañia 10-resin inklui mós empreza estatál Timor-Leste hanesan Timor-GAP, tanba daudaun sai operadór ezistente iha área tasi-laran, PCS-SO-15-01.
Estadu Timor-Leste liuhosi autoridade reguladór hamosu ona kalendáriu iha loron 01 outubru 2021, oras 16:00 sei taka konkursu públiku ne’e, nune’e loron 04 outubru to’o 30 novembru 2021 tama ba faze avaliasaun.
Enkuantu, ANPM sei anúnsia manan na’in ba konkursu públiku ne’e iha loron 03 dezembru 2021 no iha loron 10 dezembru iha ona faze aseitasaun, nune’e iha loron 13 dezembru to’o 28 janeiru 2020 iha ona faze kontratu.
“Ita iha kritéria ba kualifikasaun hodi sukat kapasidade tékniku no finanseiru, ne’ebé ita mós fó ona informasaun detallu kona-ba pra-kualifikasaun liuhosi iha link: http://licensinground.anpm.tl/,” nia akresenta.
Relasiona ho situasaun surtu COVID-19 ne’ebé afetadu iha mundu tomak, tuir Dirijente ne’e situasaun pandemia globál la dikulta promosaun ba konkursu públiku.
“Ita iha meiu promosaun online inklui mós online roadshow no conference event ne’ebé desde 2020 to’o agora realiza dala-ualu ona. Ita mós uza ajénsia promosaun internasionál ida hanaran IN-VR hodi ajuda halo promosaun,” nia subliña.
Bloku 18 ne’ebé identifika, tuir estudu sízmiku iha estrutura fatuk no basia ho kamada fatuk ne’ebé iha potensialidade boot bele akumula petróleu no gás.
Iha loron 03 outubru 2019, ANPM ho apoiu hosi IN-VR Oil & Gas realiza simeira internasionál kona-ba Timor-Leste Oil & Gas Summit 2019 no biban ne’e Governu Timor-Leste liuhosi Primeiru-Ministru, Taur Matan Ruak, lansa ona konkursu públiku ba petróleu no gás hamutuk bloku 18.
Jornalista: Florêncio Miranda Ximenes
Editora: Julia Chatarina
