LIQUIÇA, 25 marsu 2021 (TATOLI) – Uma-kain 70-resin iha Suku Asumano, Postu Administrativu Liquiça, Munisípiu Liquiça, asesu ona ba bee-moos liuhosi apoiu WaterAid.
Projetu kanalizasaun bee-moos ne’e gasta osan ho montante $45,820.20 ne’ebé implementa hosi ONG Fundasaun Hafoun Timor Lorosa’e (FHTL).
Xefe Suku Asumano, Bernardino Martins, agradese ba WaterAid no FHTL ne’ebé laran-luak dada ona bee-moos ba komunidade Asumano, ne’ebé tinan barak la asesu ba bee-moos.
“Ita tenke uza bee-moos ne’e ho di’ak. Labele ko’a estraga kanu sira-ne’e. Kuida para ita mak uza to’o tempu naruk,” Bernardino Martins, hateten iha nia intervensaun iha serimónia inaugurasaun bee-moos ne’e iha Asumano, kinta ne’e.
Iha fatin hanesan Administradór Munisipiu Liquiça, Domingos da Conseição dos Santos, hateten kontribuisaun ne’ebé komunidade koopera ho ONG ne’ebé dada ona bee-moos bele ajuda Estadu hamenus ona preokupasaun povu nian iha nesesidade báziku ba bee-moos.
“Bee-moos mak ne’e ona, haree uza no kuida ba tempu naruk. Bainhira imi estraga de’it kanu ida, estraga ema uma kain barak nia vida,” nia afirma.
Serimónia inaugurasaun bee-moos ne’e hodi selebra loron mundiál bee-moos ne’ebé monu iha loron 22 marsu, kada tinan.
Jornalista : Hortencio Sanchez
Editór : Francisco Simões
