Xanana husu sai arguidu, PGR: “Depois mak ita ko’alia”

DILI, 30 marsu 2021 (TATOLI)-Prokuradór Jerál Repúblika (PGR), José da Costa Ximenes, seidauk bele fó komentáriu detallu kona-ba pedidu Prezidente Partidu Kongresu Nasionál Rekonstrusaun Timorense (CNRT, sigla portugés), Kay Rala Xanana Gusmão nian ba Ministériu Públiku (MP) atu notifika fali nia hanesan arguidu.
“Ida-ne’e matéria investigasaun, depois mak ita ko’alia,” Prokuradór Jerál Repúblika (PGR, sigla portugés), José da Costa Ximenes, hateten hodi responde jornalista sira iha Parlamentu Nasionál, tersa ne’e.
Notísia Relevante : Xanana husu MP notifika fali nia hanesan arguidu
Liuhosi konferénsia imprensa, hafoin presta deklarasaun ba MP, segunda (29/03), Prezidente Partidu CNRT, Kay Rala Xanana Gusmão, klarifika katak nia husu ba Ministériu Públiku (MP) atu notifika nia hanesan arguidu para bele ba hatán iha Tribunál kona-ba kazu sira ne’ebé Sekretáriu Jerál partidu Frente Revolusionáriu Timor-Leste Independente (FRETILIN), Mari Bin Amude Alkatiri, hatama ba MP.
Komandante Em-Xefe FALINTIL ne’e esklarese mós katak kazu subornu ne’ebé deskunfia envolve hosi Mari Alkatiri ne’e, sai tiha ona koñesimentu públiku, dezde 2004/2005 no la’ós buat foun ida no durante prosesu negosiasaun Fronteira Marítima ho Austrália, iha Komisaun Konsiliasaun, Xanana sempre lori dokumentu Conoco Philips nian ne’e, tanba ne’e Xanana preparadu atu hatudu karik presiza.
Notísia Relevante : Xanana ba hatán notifikasaun MP hanesan testemuña
Prezidente Partidu Kongresu Nasionál Rekonstrusaun Timorense (CNRT), Kay Rala Xanana Gusmão, segunda ne’e, purvolta tuku 08:50 Otl, marka prezensa iha Ministériu Públiku hodi ba hatán notifikasaun hosi MP nian.
Lider Karizmátiku hetan notifikasaun hosi MP hanesan testemuña relasiona ho keixa ne’ebé hatama hosi Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri, kontra membru Bankada CNRT iha Parlamentu Nasional ho mós keixa balun kona-ba alegasaun hosi Komisaun Polítika Nasional (CPN) CNRT nian.
Iha loron 18 janeiru 2021, tinan ne’e Sekretáriu Jerál FRETILIN, Mari Alkatiri, presta deklarasaun iha Ministériu Públiku (MP) kona-ba keixa tolu ne’ebé antes ne’e nia parte hatama ba MP.
Notísia Relevante : Marí Alkatiri Hato’o Ona Keixa Ba MP Kontra Membru CPN-CNRT
Iha fali loron 07 jullu 2020, Mari Alkatiri, hatama ona keixa dahuluk ba Ministériu Públiku hasoru membru CPN- CNRT kona-ba akuzasaun simu subornu hosi kompañia ConocoPhillips.
Membru CPN-CNRT antes ne’e liuhosi konferénsia imprensa no mós halo publisidade liuhosi órgaun komunikasaun sosiál sira, hodi aprezenta dadus balun kona-ba deskonfia indikasaun subornu hosi kompañia internasionál ConocoPhillips ba Mari Alkatiri ho baze dokumentu hosi kompañia Oceanic Exploration ne’ebé akuza katak ConocoPhillips fó subornu ba Mari Alkatiri ho montante osan millaun $2.5.
Notísia Relevante : Kona-ba Alkatiri nia keixa, MP sei notifika CPN-CNRT
Jornalista : Nelson de Sousa
Editór : Francisco Simões

