Raul Lemos apoiu nesesidade bázika ba komunidade afetadu dezastre naturál
DILI, 06 abríl 2021 (TATOLI)-Emprezáriu Timor-oan, Raul Lemos, tersa ne’e, entrega apoiu nesesidade báziku ba Sekretária Estadu Protesaun Sivíl (SEPS) hodi bele tulun komunidade afetadu dezastre naturál.
Apoiu ne’e, Raul Lemos entrega direita ba Sekretáriu Estadu SEPS, Joaquim Gusmão akompaña hosi kargu xefia sira iha edifísiu SEPS, Caicoli, Dili.
Sasán sira ne’ebé maka Raul Lemos ho nia família no nia empreza RayaTex&Atramor entrega maka hanesan foos saka 100, susu-ben enak ho dos 20, kafé Timor kilograma 100, masin-midar ho kilograma 25, masin dapur nian dos 10, mina Bimoli 2 litru ho kuantidade 100 (botol), pastadente ho dos 10, eskova kose-nehan dos 10, sabaun Nuvo dos 10.
Diva Pop Indonézia, Krisdayanti nia marido ne’e entrega mós máskara dos ualu (8) korresponde ho kuantidade 4.800 pcs, roupa jas feto kuantidade 100 pcs, dres-bluse feto kuantidade 120 pcs, kamiza labarik mane kuantidade 180 pcs, kamiza mane ba ema adultu kuantidade 120 pcs, ho roupa feto ba ema adultu kuantidade 71 pcs.
Raul Lemos, hateten ho situasaun ne’ebé daudaun povu Timor-Leste enfrenta hanesan COVID-19 ho tan akontesimentu dezastre naturál iha sabadu-domingu (03-04/04/2021), halo Timor-oan barak iha rai laran terus to’o balun lakon vida, tanba ne’e, fanu Timor-oan hotu atu lolo-liman ba malu no tane malu tuir ida-idak nia kbiit.
“Ami foti inisiativa hodi lori mai iha SEPS tuir buat ne’ebé ami bele hanesan ai-han ruma, roupa no sabaun sira, nune’e SEPS bele distribui tutan ba abitante sira ne’ebé afetadu dezastre naturál ne’e,’’Raul Lemos hateten.
Nia dehan, RayaTex&Atramor mós apoiu máskara nune’e bele utiliza hodi halo prevensaun ba COVID-19.
Hosi sorin seluk, operador telekomunikasaun Telkoncel ho konpañia Fortuna Star mós apoiu sasán nesesidade báziku ba SEPS hodi distribui ba iha komunidade afetadu sira.
Grupu emprezáriu Xineza sei apoiu mós
Sekretáriu Estadu SEPS, Joaquim Gusmão, tersa lokraik ne’e, simu audiénsia grupu emprezáriu Xineza iha Timor-Leste
Wel Yuan Qiong, nu’udar reprezenta grupu emprezáriu Xineza iha Timor-Leste hateten, enkontru ne’e ko’alia kona-ba saida mak grupu emprezáriu Xineza bele apoiu iha situasaun emerjénsia ne’e.
“Kuarta aban (07/04), ami sei prepara hodi bele fó apoiu no kontribuisaun sira-ne’e mai hosi emprezáriu Xineza ida-idak ho nia forsa,” Wel Yuan Qiong hateten.
Jornalista : Nelson de Sousa
Editór : Francisco Simões
