LIQUIÇA, 09 abríl 2021 (TATOLI) – Ekipa Saúde Munisípiu Liquiça, sesta ne’e, iha Administrasaun Munisípiu Liquiça, hahú halo sosializasaun ba autoridade kompetente sira no lider relijioza sira iha Munisípiu Liquiça kona-ba vantajen vasinasaun COVID-19 ho tipu AstraZeneca.
Notísia Relevante : PM Taur sente forte bainhira simu tiha vasina AstraZeneca
Administradór Munisipiu Liquiça, Domingos da Conceição dos Santos, hateten, sosializasaun ne’e importante atu nune’e labele halo komunidade sira pániku no husu komunidade hotu koopera di’ak atu simu vasinasaun AstraZeneca ne’e.
“Ita-nia komunidade sira fiar liu mak informasaun sira negativa kona-ba vasinasaun AstraZeneca. Tanba ne’e ho sosializasaun ne’e bele ajuda komunidade komprende kona-ba importánsia vasinasaun AstraZeneca atu kontra pandemia COVID-19,” Domingos da Conceição dos Santos hateten iha nia intervensaun.
Iha fatin hanesan, reprezentante Saúde nasionál pilár 2 ba prevensaun COVID-19, Rita M. Soares, esplika sosializasaun ne’e atu divulga mós informasaun loloos ba lider komunitáriu sira iha rea jurisdisaun Munisípiu Liquiça nian kona-ba importánsia vasinasaun AstraZeneca ba luta konta COVID-19.
“Ohin ami mai iha fatin ida ne’e atu fahe informasaun kona ba vasinasaun nian. Vasinasaun kontra COVID-19 ho tipu AstraZeneca ne’e di’ak tanba ita nia lider boot sira simu ona iha Dili,” Rita M. Soares hateten.
Nia hatutan, vasinasaun ne’e la’ós obrigatóriu maibé atu prevene-an hosi COVID-19 no espera ema hotu voluntáriamente partisipa simu vasina AstraZeneca.
Jornalista : Hortencio Sanchez
Editór : Francisco Simões
