DILI, 09 abríl 2021 (TATOLI)-–Primeiru-Ministru (PM), Taur Matan Ruak, husu públiku hamutuk hodi hasoru situasaun difisil hanesan kamalidade iha Timor-Leste.
Governu aprova ona Projetu Rezolusaun Governu ba deklarasaun Estadu kalamidade iha nível nasionál ba períodu loron 30, hodi hasoru akontesimentu inundasaun iha munisípiu Dili loron 04 abríl, ne’ebé provoka hosi siklone tropikál Seroja.
Notísia relevante: Timor-Leste deklara Estadu situasaun kalamidade nível nasionál durante loron 30
“Ha’u lembra ita-nia inan-aman sira katak, ita hanesan povu lutador, ne’ebé iha minutu ne’ebé difisil ita presiza hamutuk luta atu manán. Tanba ne’e ha’u husu ita kontinua hamutuk no labele fahe malu, labele hasa’e ida hatún ida, ne’e ita la manán. Timor-oan la manán, ha’u la manán, nein Prezidente manán, Avo Nana (Xanana Gusmão) mós la manán buat ida, ami hotu la manán, ita hotu la manán,” Xefe Governu hato’o mensajen liuhosi nota imprensa ne’ebé Agência TATOLI asesu, sesta ne’e.
Xefe Ezekutivu subliña, laiha ema ida hakarak sofre, tanba ne’e tenke serbisu maka’as atubele rekupera hikas situasaun hafoin dizastre naturál.
“Ita hakarak manán hotu, tanba ne’e tenke hamutuk atu ita hotu luta. Sofre, ita hotu lakohi, maibé mai ona (dezastre naturál) ita tenke enfrenta hanesan inimigu,” PM enkoraja.
Tanba ne’e, Xege Governu konvida populasaun tomak atu hamutuk hasoru situasaun difisil jodi hetan moris hakmatek no hakarak país ba oin.
“Ita hakarak ita-nia rain nia naran morin, ita hakarak ita-nia povu ne’e ema elojia nu’udar povu ne’ebé lutadór, sé lae ita-nia komportamentu la di’ak, ha’u hanoin ita hatún ita-nia an, hatún ita-nia nasaun, hamoe ita-nia rain, hamoe ita-nia an, ne’e ladún di’ak,” nia hatutan.
PM afirma, ba afetadu dezastre naturál, sira sei la mesak, maski Governu labele halo milagre hodi halo buat hitu dala-ida maibé buat ne’ebé bele halo sei rezolve ba povu-nia di’ak.
Bazeia ba levantamentu dadus ne’ebé ekipa Sekretaria Estadu Protesaun Sivíl (SEPS) halo, inundasaun foin lalais ne’e afeta ema 40 resin iha territóriu tomak mak lakon vida, balun lakon no seidauk hetan, iha mós posibilidade númeru ne’e aumenta tanba levantamentu dadus la’o nafatin.
Enkuantu, uma hamutuk 10.000 mak hetan estragu no ema hamutuk 14.000 mak desloka ba fatin evakuasaun provizóriu tanba lakon hela fatin.
Ba kestaun ne’e, parte Governu hahú forma ekipa hodi alista infraestrutura ne’ebé a’at inklui tau-matan ba vítima dizastre naturál hodi neneik bele rezolve hodi rekupera situasaun.
Jornalista: Antónia Gusmão
Editora: Julia Chatarina
