DILI, 11 abríl 2021 (TATOLI)—Centro Formação Profesional (CFP) Dom Bosco Comoro (DBC), rekomenda ba Governu atu aselera prosesu identifikasaun ba uma-sira ne’ebé estragadu totál iha loron 04 abríl, nune’e bele kria lalais kondisaun ba vítima-sira.
Rekomendasaun CFP-DBC ne’e tanba populasaun afetadu-sira ne’ebé hela iha sentru evakuasaun, barak mak sofre ona moras, liuliu labarik-sira.
Notísia relevante:Governu presiza millaun $200 responde dezastre naturál
“Governu tenke halo identifikasaun lalais ba vítima sira-nia uma, nune’e labele hela kleur iha sentru evakuasaun, tanba ema barak-liu bele provoka moras seluk ne’ebé perigu-liu,” Diretór CFP-DBC, Irmão Adriano de Jesus, SDB, hateten ba jornalista Agência Tatoli, iha Comoro, sábadu ne’e.
Diretór CFP-DBC klarifika katak, rekomendasaun ne’e la’ós tanba lakohi atu simu maluk afeitadu-sira, maibé atu tulun diak liu-tan oinsá labele kria fali problema seluk, liuliu problema saúde.
Irmão Adriano de Jesus rekoñese katak, papél Governu-nian atu haree duni situasaun ida-ne’e no labele konstrui hikas uma iha sira-nia uma fatin, maibé tenke identifika fatin seluk hodi halo kedan uma mak bele haruka sira ba okupa.
“Bainhira Governu hadi’a fila-fali uma iha vítima sira-nia uma fatin, sei la rezolve problema tanba ita haree maioria uma sira ne’ebé hetan estragus iha área risku hanesan rai lolon, rai-hun no mota-ninin. Aban bain-rua udan boot bele estraga fila-fali no Governu lakon osan saugate,” nia sujere.
Relijiozu ne’e mós husu ba maluk afetadu-sira atu onestu no ho konsiénsia moos tenke ko’alia buat loos, katak, uma hetan duni estragus hosi inundasaun, labele aproveita fali situasaun hodi bosok Governu.
“Se mak uma sei di’ak, di’ak-liu onestu no ba hela lai iha uma ne’e, atu tulun Governu hodi halo uma ba sira ne’ebé hetan duni estragus totál hosi dezastre naturál,” Irmão Adriano de Jesus subliña.
Hosi sentru evakuasaun CFP-DBC, Irmão Adriano de Jesus lori maluk afeitadu-sira nia naran, agradese ba parte hotu-hotu liuliu Governu ne’ebé fó ona apoiu ai-han to’o momentu ida-ne’e.
“Iha-ne’e lorloron sira han dala-tolu, tanba hetan hahan hosi ema laran luak sira. Maibé, ita labele hanesan ne’e nafatin, tenke book-aan atu sira mós bele fila ba fatin ida ne’ebé di’ak liu,” nia hateten.
Parte CFP-DBC mós prontu atu kolabora hodi fó aopiu ba Governu liu hosi serbisu hamutuk ho líder komunitáriu-sira atu halo identifikasaun ba komunidade afetadu-sira nia uma ne’ebé hetan estragus, hodi aselera prosesu.
Hosi 04 to’o 08 abríl sentru evakuasaun iha CFP-DBC rejista uma-kain 500, hosi númeru ne’e iha uma-kain 100 mak fila ona ba sira-nia uma, no oras ne’e daudaun iha ema besik 2.000 mak sei refujia iha sentru ne’e.
Jornalista: Arminda Fonseca
Editór: Cipriano Colo
