DILI, 11 abríl 2021 (TATOLI)—Governu Japaun liu hosi Ajénsia Kooperasaun Internasionál Japaun-nian (JICA) iha Timor-Leste, hein hela pedidu ofisiál hosi VIII Governu Konstitusionál, atu oferese enjeñeru hodi redezeña barrajen mota-sira.
“To’o agora seida’uk iha pedidu ofisiál hosi Governu Timor-Leste kona-bá asuntu ne’e,” Reprezentante JICA iha TL, Goto Ko, hateten ba jornalista-sira iha Aeroportu Internasionál Prezidente Nicolau Lobato, Comoro, domingu ne’e.
Notísia relavante:PM Taur atu husu apoiu enjeñeiru Japaun redezeña barrajen mota
Goto Ko deklara, Japaun prontu fó apoiu maibé hein pedidu ofisiál no depende ba nesesidade Governu TL.
Nia informa mós katak, bainhira iha ona pedidu ofisiál, ekipa Japaun-nian sei halo inspesaun ba infraestrutura ne’ebé hetan estragus, no sei aprezenta relatóriu, nune’e bele estabelese kooperasaun ho Governu Timor-Leste.
Antes ne’e Primeiru Ministru (PM), Taur Matan Ruak, hateten Governu iha inisiativa atu husu tulun ba Governu Japaun hodi fó apoiu enejeñeru atu redezeña barrajen mota-sira.
Inisiativa ne’e mosu hafoin Xefe Governu hamutuk ho membru Governu ne’ebé tutela ba área insfraestrutura, no entidade relevante-sira halo observasaun direta ba ba barrajen-sira iha Dili laran, ne’ebé hetan estragus hosi inundasaun iha 04 abríl tinan ne’e.
Notísia relavante:PM Taur: Laiha konseitu, dezeñu fó impaktu ba kualidade obra
Jornalista: Nelson de Sousa
Editór: Cipriano Colo