DILI, 19 abríl 2021 (TATOLI)—Komandu Jerál Polísia Nasionál Timor Leste (PNTL), sei hein relatóriu kona-bá atuasaun membru balun hasoru estudante-sira, iha kuarentena Holbeli, Suai, Munisípiu Covalima, sábadu (17/04/21).
Portavóz Komandu Jerál PNTL, Superintendente Xefe, Arnaldo Araújo, hateten vídeo ne’ebé virál iha midía sosiál hatudu katak, membru PNTL balun no mós membru balun hosi FALINTIL-Forsa Defeza Timor-Leste (F-FDTL), rasta, tebe no lori gás lakrimujéniu rega ba estudante-sira iha kuarentena.
Notísia relevante:CIGC husu Governu kria kritéria kontrola auto izolamentu-kuarentena
Arnaldo Araújo hatutan, iha vídeo ne’e mosu dezintendimentu entre estudante ho autoridade seguransa, bainhira ekipa saúde to’o iha kuarentena estudante-sira lakohi fó fatin ba ekipa vizilánsia hodi evakua estudante balun ne’ebé pozitivu COVID-19.
Tanba ne’e, portavóz Komandu Jerál PNTL ne’e dehan, kronolojia loloos hosi insidente ne’e sei hein relatóriu hosi Komandu Munisipál Covalima.
“Ita hein relatóriu hosi komandante Munisípiu ne’ebé sei to’o ohin. Ho ida-ne’e mak komandu bele haree no estuda atu foti asaun,’’ Arnaldo Araújo hateten ba jornalista-sira liu hosi konferénsia imprensa iha, Caicoli, Dili, segunda ne’e.
Nia apela ba ema hotu atu kumpre regra ne’ebé Governu fó-sai liu-liu pasiente ne’ebé teste no suspeita pozitivu ba COVID-19, tenke koopera ho ekipa saúde atu submete ba sala izolamentu nune’e evita transmisaun ba virus.
Jornalista: Nelson de Sousa
Editór: Cipriano Colo
