LIQUIÇA, 19 abríl 2021 (TATOLI) – Xefe Sentru Saúde Liquiça no mós responsavel másimu ba vasinasaun AstraZeneca Munisípiu Liquiça, Beatris Filomena dos Santos, informa, hosi loron primeiru vasinasaun AstraZaneka ba liña frente hotu iha Liquiça hatudu progresu di’ak.
Notísia Relevante : Ekipa liña frente Liquiça sei simu uluk vasina AstraZeneca
“Progresu ba vasina ne’e di’ak tebes, iha loron primeiru hahú médiku iha ema na’in 50 no to’o ohin loron vasina ona ema hamutuk na’in-176 simu vasina AstraZeneca ho di’ak tebes,” Beatris Filomena dos Santos, hateten hodi responde Agência Tatoli iha Sentru Saúde Liquiça, segunda ne’e.
Nia informa, iha sesta mai ne’e, termina ona vasina ba liña frente hodi haree fali ba komunidade sira hosi idade 18 to’o 50.
“Hirak ne’ebé tinan 60 ba leten ho moras króniku sei la hetan vasina AstraZeneca,” nia esplika.
Hanesan médiku nia nafatin husu ba komunidade atu partisipa vasina ne’ebé iha hodi prevene an hosi COVID-19 no nia garante vasina ne’e sei la fó impaktu negativu ba ema nia vida.
nia mós apela ba komunidade iha Liquiça labele iha intensaun iha kakutak katak atu simu vasina nune’e bele lao livre maibé vasina ne’e atu prevene an hosi COVID-19.
Iha sorin seluk Jestór Radio Komunidade Tokodede, Eduardo Exposto hanesan mós liña frente ne’ebé simu ona vasina AstraZeneca fó sasin katak, vasina ne’e di’ak tebes.
“Ha’u ho membru na’in-neen mak simu ona vasina ne’e hosi Saúde Munisípiu Liquiça, Ami sente di’ak tebes tanba ami hala’o knar hanesan jornalista iha liña oin la dun hetan ona ameasa hosi COVID-19,” nia haktuir.
Nia informa, reasaun ne’ebé sira sente bainhira simu vasina AstraZeneca iha nia membru balu mak hetan sintoma hanesan isin manas, laran sa’e no oin halai.
Jornalista : Hortencio Sanchez
Editór : Francisco Simões
