Alterasaun OJE 2021, prevee millaun $51,9 ba liña frente
DILI, 20 abríl 2021 (TATOLI)—Proposta Orsamentu Retifikativu liuhosi alterasaun Orsamentu Jerál Estadu (OJE) 2021 prevee millaun $51,9 ba traballadór liña frente no millaun $31 finaliza programa Cesta Bázika iha territóriu nasionál.
Notísia Relevante: Aban, PN debate proposta Orsamentu Retifikativu
Tuir relatóriu no paresér hosi Komisaun C (Finansa Públika) ne’ebé Agência TATOLI, asesu tersa ne’e, katak totál orsamentu retifikativu hamutuk millaun $223,8 ne’ebé realokasaun verba hosi Fundu Infraestrutura ho valór millaun $62, realokasaun hosi verba Dotasaun Todo Governu ho montante millaun $26,5 no integrasaun saldu jerénsia ne’ebé la inskritu (não inscritos) iha OJE 2021 ho montante millaun 135,3.
“Hosi montante orsamentu millaun $223,8 koloka ba kombate no halo prevensaun pandemia COVID-19 ho valór millaun $51,2, medida apoia sósiu-ekonómika millaun $81,7, finalizasaun pagamentu Cesta Bázika millaun $31, atribuisaun suplementu remuneratóriu ba traballadór liña frente millaun $51,9 no dotasaun kontinjénsia ba fundu COVID-19 millaun $8,” refere relatóriu no paresér hosi Komisaun C (Finasa Públika) ne’e.
Bainhira aprezenta relatóriu no paresér iha debate faze jeneralidade ba alterasaun OJE 2021, tersa (20/04) ne’e, Prezidente Komisaun C Deputada Maria Angélica Rangel hateten, Parlamentu Nasionál atu halo alterasaun ba OJE 2021, tanba situasaun oras ne’e Timor-Leste hasoru surtu COVID-19 no dezastre naturál ne’ebé timor-oan hotu nia responsabilidade, liuliu Parlamentu Nasionál atubele halo altresaun ba orsamentu ne’ebé mak iha nune’e kontinua fó apoiu ba Governu.
Iha proposta-alterasaun ne’e atu foka ba prevensaun COVID-19, apoia sósiu-ekonómika, finalizasaun cesta bázia no atribuisaun suplementu remuneratóriu ba traballadór liña frente sira.
Jornalista: Evaristo Soares Martins
Editór: Cancio Ximenes
