DILI, 23 abríl 2021 (TATOLI)—Despeza ba kategoria kapitál dezenvolvimentu iha Fundu Infraestrutura (FI) sofre alterasaun millaun $54 hodi reforsa fundu kontinjénsia nune’e fó resposta ba dezastre naturál.
Fundu Infraestrutura alterada ne’e ho rezultadu votasaun a-favor 63, kontra 0 no abstensaun 0.
“Fundu Infraestrutura sofre alterasaun millaun $54 ne’e loos, aumenta tán proposta ida ho millaun $3 hanesan ne’e,” Prezidente Komisaun C (Finansa Públika), Prezidente Komisaun C, Deputada Maria Angélica Rangel, informa ba Agência TATOLI, iha PN, sesta ne’e.
Entretantu Fundu Infraestrutura (FI) ne’ebé PN aprova liuhosi Orsamentu Jerál Estadu (OJE) 2021 ho montante millaun $339.605 ba fundu infraestrutura.
Montante orsamentu millaun $339.605 ne’e kompostu hosi rihun $32 ba saláriu no vensimentu, millaun $1.040ba bens (sasán) no servisu no millaun $338.533 ba kapitál dezenvolvimentu.
Iha Fundu Infraestrutura ne’e mós prevee rihun $60 ba boa governasaun no jestaun institusionál, setór agrikultura millaun $3.298 (sofre alterasaun rihun $900), água no saneamentu millaun $3.449 (-rihun $300).
Hosi parte dezenvolvimentu urbanu no rurál millaun $5.040 (-rihun $500), edifísiu públiku millaun $6.893 (-millaun $2,200), edifísiu edukasaun millaun $3.743 (-millaun $1,700), enérjia elétrika millaun $17.821 (-millaun $4), ekipamentu komputadór millaun $12,384 (-millaun $7,5), saúde millaun $3,144 (-millaun $1,3), seguransa no defeza millaun $12,384 (-millaun $4).
Nune’e mós solidariedade sosiál millaun $1 (-rihun $200), projetu tasi mane millaun $3.5 (-rihun $5), aeroportu millaun $13.543 (-millaun $5), preparasaun dezeñu no supervizaun ba projetu foun millaun $7.441 (-millaun 4,5), estrada millaun $95.215 (-millaun $20,5).
Entretantu portu millaun $1,414 (-rihun300), programa ba setór turizmu rihun $ 652 (-rihun $100), programa empréstimu millaun $70.700, programa setór finansa millaun $2.90 no Sekretariadu Estadu Juventude no Desportu millaun $1.534 (-rihun $500).
Proponente hosi proposta ne’e mak Deputadu Abel Pires da Silva hosi bankada Partidu Libertasaun Populár (PLP).
Jornalista: Evaristo Soares Martins
Editór: Cancio Ximenes
