DILI, 23 abríl 2021 (TATOLI)—Prezidente Repúblika (PR), Francisco Guterres ‘Lú Olo’ hakarak Parlamentu Nasionál aselera debate orsamentu retifikativu liuhosi alterasaun Orsamentu Jerál Estadu (OJE) 2021 nune’e responde problema cheias no inundasaun ne’ebé akontese iha loron 4 abríl liubá no surtu COVID-19.
“Atu informa, Prezidente Repúblika mós hein hela (orsamentu retifikativu) tanba iha última audiénsia horisehik, ha’u dehan loron 28 abríl sei envia diploma ne’e ba Prezidente Repúblika. Nia (Xefe Estadu) hatán de’it ho pergunta ida, dia 28? Ha’u komprende ona katak Prezidente Repúblika hakarak orsamentu ne’e lalais liu,” Prezidente Parlamentu Nasionál, Deputadu Aniceto Longuinhos Guterres Lopes, informa liuhosi plenária, sesta ne’e.
Ho alarma Xefe Estadu nian, Aniceto dehan ohin bele debate hotu di’ak liután nune’e responde ba situasaun emerjénsia iha territóriu nasionál.
Prezidente PN ne’e akresenta, diskusaun to’o 27 abríl no 28 abríl sei enkamiña ba Prezidente Repúblika maibé debate lalalis liu di’akliu.
Maske nune’e, nia afirma órgaun soberania tenke ezerse nafatin podér no adapta nafatin situasaun emerjénsia ne’ebé nasaun hasoru.
“Ha’u hein katak, ohin ita bele apronta no hotu-hotu la’o tuir giaun ne’ebé iha tiha ona. Se ita estende to’o kalan boot karik, ita bele apronta hotu (debate ne’e) maibé ida-ne’e la’ós ita atu lufu-lafu de’it, produtu lejizlativu ne’e tenke kualidade,” nia dehan.
Governu aprezenta proposta orsamentu retifikativu ne’e ho montante millaun $223, 8 ba Parlamentu Nasionál hodi responde ba surtu COVID-19 no oras ne’e altera tán orsamentu balun hosi OJE 2021 reponde ba dezastre naturál.
Jornalista: Evaristo Soares Martins
Editór: Cancio Ximenes
