DILI, 28 abríl 2021 (TATOLI)—Kalamidade klimátika no pandemia COVID-19 impede prosesu konstrusaun “Uma Kbiit Laek” ne’ebé Governu liuhosi Ministériu Administrasaun Estatál (MAE) planea atu halo konstrusaun iha fulan-marsu no abril nia laran ne’e.
Notísia Relevante: PNDS presiza fasilitadór 198 reforsa ekipa tékniku konstrui “Uma Kbiit Laek”
“Tuir loos ita konstrui ona Uma Kbiit Laek iha fulan-marsu no fulan ne’e nia-laran maibé ho kalamidade klimátika no pandemia COVID-19 ne’ebé impede, entaun ekipa tékniku iha suku labele sosa materiál tanba loza materiál konstrusaun nian taka hotu. Entaun agora ami halo hela planu dezeña atu hahú implementa tuir siklu ne’ebé iha,” Diretora Programa Nasionál Dezenvolvimentu Suku (PNDS), Claudina Soares Pinto, hateten ba Agência TATOLI, liuhosi telefónika, kuarta ne’e.
Iha siklu ida to’o sanulu, ekipa tékniku iha terrenu hala’o hotu ona hanesan halo survei, sensibilizasaun no seluk tan, no agora tama ba prosesu aprovizionamentu maibé tanba serka sanitária entaun empreza lokál labele sosa matérial iha nasionál tanba serka sanitária ne’ebé halo dalan sira taka hotu.
“Maibé iha tempu badak ita atu implementa duni Uma Kbiit Laek ne’e. Ne’ebé, parese konstrusaun fíziku ne’e iha fulan ida-ne’e nia rohan ka iha fulan maiu nia hahú ne’e, tanba ita-nia Governu transfere hotu ona osan ba kada konta bankária suku nian,” nia dehan.
Iha Orsamentu Jerál Estadu (OJE) 2021, Governu liuhosi Ministériu Administrasaun Estatál (MAE) aloka miliaun $25 hodi konstrui Uma Kbiit Laek iha territóriu Timor-Leste hamutuk 1.272 no kada aldeia iha benefisiáriu tolu.
Jornalista: Osória Marques
Editór: Cancio Ximenes
