DILI, 28 abríl 2021 (TATOLI)—Laureadu Prémiu Nobel da Paz, José Manuel Ramos Horta, husu ba populasaun hotu iha Timor-Leste atu kontribui ba prevensaun COVID-19 no ajuda salva rai ida-ne’e tanba moras COVID-19 daudaun ne’e tama ona ba transmisaun komunitária.
Notísia Relevante: Ramos Horta sujere Governu mantein utiliza vasina AstraZeneca
“Ha’u husu ba joven, ferik-katuas, ba populasaun sira ajuda salva ita-nia rain, salva ida-idak nia moris no ida-idak nia-aan tuir regra simples hosi Governu ne’ebé mak implementa ona liuhosi Ministériu Saúde (MS) no Organizasaun Mundiál Saúde (OMS),” José Ramos Horta apela ba populasaun sira liuhosi konferénsia imprensa, iha Faról, Dili, kuarta ne’e.
Eis Prezidente Repúblika ne’e apela nafatin ba populasaun sira atu di’ak liu fiar katak COVID-19 ne’e eziste iha Timor-Leste no proteje-aan hosi moras ne’e. Nia husu ba populasaun sira tenke uza máskara bainhira presiza sai ba liur, fase liman beibeik no distansiamentu sosiál no fíziku, hanesan medida importante ba ema ida-idak nia moris.
Nia husu ba timor-oan sira, se entre ema baibain mak la rona malu karik maibé pelumenus rona netik doutór sira no tenke kumpre medida prevensaun ne’ebé Governu fó sai.
“Ha’u lakohi fulan neen liu tiha, haree fali epidemia ne’ebé oho ema mate barak hanesan lalar no nehek hanesan rai seluk, ha’u lakohi hateten nune’e. Ita-boot sira la rona malu no favór rona doutór sira, no halo tuir ba saida mak Governu fó sai mak tenke uza máskara, fase liman no distansiamentu sosiál no fíziku,” Ramos Horta apela.
Tanba, nia hateten, haree ba realidade no esperiénsia iha nasaun seluk hatudu katak ema mate barak tanba de’it populasaun sira la fiar no la halo tuir regra ne’ebé sira-nia Governu implementa.
Notísia Relevante: Ramos Horta husu Governu estuda didi’ak molok simu vasina Sinovac
Jornalista: Osória Marques
Editór: Cancio Ximenes
