LIQUIÇA, 29 abríl 2021 (TATOLI) – Autoridade lokál Suku Tibar, Postu Administrasaun Bazartete, Munisipiu Liquiça, identifika ona uma hamutuk 24 mak rai taka total iha inundasaun, 04 abríl liubá ne’e.
Xefe Suku Tibar, Bento Correia da Conceição hateten, dadus kona-ba vítima inundasaun sira-nian foti hotu ona no submete ona ba nasionál.
NotíSia Relevante : MSSI Liquiça oferese materiál eskola ba estudante Tibar
“Komunidade ne’ebé mak uma lakon ne’e dadus ami foti ona horiseik mak loron ikus ami halo identifikasaun. Uma 24 ida-ne’e estraga total ka rai taka tomak tiha,” Xefe Suku Bento Correia da Conceição hateten ba Agência Tatoli iha Tibar, kinta ne’e.
Nia dehan, daudauk ne’e família uma-kain 24 ne’e provizóriu hela de’it ho família sira tanba uma laiha kondisaun atu hela.
Ba uma-kain 24 ne’ebé dezastre ho kategoria grave total seidauk hetan apoiu material ruma atu konstroi hikas sira-nia uma tanba dadus Autoridade lokál foin submete ba nasionál.
Suku Tibar kompostu hosi Aldeia haat mak hanesan, Turleu, Mausoi, Lihbaulelo no Fatunia no maioria komunidade iha aldeia haat ne’e sasán hetan estraga hotu hosi inundasaun.
Jornalista : Hortencio Sanchez
Editór : Francisco Simões
