DILI, 30 abríl 2021 (TATOLI)—Sentru Formasaun Jurídika no Judisiáriu (SFJJ) prevee ona rihun $30 iha Orsamentu Jerál Estadu (OJE) 2021, atu konstrui-tan aula hamutuk 10.
“Ita tau ona iha OJE 2021 atu loké-tan aula 10 iha sentru formasaun jurídika, hodi formadór-sira utiliza ba serbisu no formasaun,” Diretór SFJJ, Antonino Gonçalves, hateten ba Agéncia Tatoli, sesta ne’e.
Notísia relevante:SFJJ loke vaga ba formasaun juis
Tanba ne’e, Ministériu Justisa mak iha kompeténsia kona-bá prosesu aprovizionamentu atu loke konkursu ba konstrusaun ne’e.
“Aula atu loké-tan ne’e sei halo tutan de’it ho uma SFJJ iha Caicoli. SFJJ iha aula ne’ebé sufisiente atu utiliza ba formasaun ba autór judisiál-sira no konstrusaun ne’e sei loke liu-tan espasu,” nia esplika.
Antes ne’e, Ministru Justisa (MJ), Manuel Cárceres vizita ona sentru formasaun ne’e no parte tékniku mós haree ona, hodi hein ba prosesu tuir-mai.
Entertantu, SFJJ loke formasaun atu sai juiz, prokuradór no defensór presiza Timoroan ne’ebé lisensiadu iha área direitu. Kada área, presiza kanditadu na’in 23, hodi bele tuir formasaun no sira ne’ebé iha valór di’ak liu sei prienxe vaga 15, posibilidade sei hahú formasaun iha juñu.
Jornalista: Nelson de Sousa
Editór: Cipriano Colo