DILI, 29 abríl 2021(TATOLI)—Xefe Suku Caicoli, Postu Administrativu Vera Crúz, Munisípiu Dili, Hipolito Marques Ximenes, hateten suku Caicoli rejista reklamasaun ba Cesta Bázika nian hamutuk xefe família 74.
“Ami rejista no simu ona reklamasaun ba Cesta Bázika ho xefe família hosi aldeia zero um (01) to’o zero cinco (05) nian hahú hosi segunda to’o agora hamutuk 74, maibé ami kontinua simu,” Xefe Suku Caicoli hateten ba Agência TATOLI, iha nia knaar fatin, Caicoli, Dili, kinta ne’e.
Reklamasaun ne’e sei la’o nafatin no bainhira reklamasaun ne’e ramata, parte suku sei hato’o ba administradór postu administrativu no Prezidente Autoridade Munisípiu asina tiha, mak hafoin haruka ba Ministériu Administrasaun Estatál (MAE).
Lista reklamante sira-ne’e iha hela lista Suku Caicoli nian maibé tanbasá mak tempu atu simu Cesta Bázika naran labele mosu iha sistema hosi Ministériu Turizmu Komérsiu Indústria (MTCI-sigla portugés) no MAE nian.
“Ha’u ko’alia nune’e tanba ami-nia ema haruka ba ne’e naran kompletu. Dala ruma reklamasaun sira-ne’e balun naran laiha iha lista MAE nian. Ida-ne’e mak sai polémika ne’ebé ami hasoru,” nia dehan.
Nia dehan, lista hosi inísiu to’o mai agora mantein ho lista uluk, hahú hosi pagamentu sosiál, lista ne’e ema simu osan subsídiu $200 nian. Lista ida-ne’e mak Suku Caicoli haruka ba Ministériu Solidaridade Sosiál no Inkluzaun (MSSI) no MAE.
Tuir planu, segunda (03/05) semana oin, nia parte submete dadus reklamasaun ne’e ba parte relevante atu prosesa, nune’e iha tempu badak benefisiáriu reklamante sira mós bele simu ona Cesta Bázika ne’e.
“Maske Governu atu deside tan Estadu Emerjénsia ba dala-XIII, maibé ha’u husu nafatin atu Governu kontinua distribui Cesta Bázika tanba ne’e povu nia direitu,” nia dehan.
Ho ida-ne’e, Xefe Suku Caicoli kontinua apela ba komunidade atu mantein prevensaun COVID-19 nian hodi kumpre regra ne’ebé Ministériu Saúde (MS) no Organizasaun Mundiál Saúde (OMS) implementa ona iha terrenu hanesan uza máskara, fase liman, distansiamentu sosiál no fíziku.
Jornalista: Osória Marques
Editór: Cancio Ximenes
