Traballadór nu’udar eroi foun iha faze dezenvolvimentu
DILI, 01 maiu 2021 (TATOLI)- Iha loron 01 maiu 2021, mundu tomak no Timor-Leste selebra Loron Internasionál Traballadór nian, ne’ebé komunidade Katólika mós selebra nu’udar loron Saun José Operáriu nian, ho objetivu atu rekoñese no valoriza kna’ar traballadór sira-nian iha sosiedade.
“Traballadór-sira nu’udar eroi foun sira iha faze Dezenvolvimentu Nasionál daudaun ne’e nian no liuhosi sira mak ita harii nasaun ida-ne’ebé forte, riku no seguru,” Primeiru-Ministru (PM), Taur Matan Ruak hateten liuhosi nota imprensa ne’ebé Agência Tatoli simu iha sábadu ne’e.
Xefe Governu ne’e hatutan, loron traballadór nian la’ós de’it feriadu ka loron deskansa nian ida, maibé sai nu’udar biban ida ne’ebé di’ak tebetebes atu hahí empeñu, méritu, dixiplina, profisionalizmu, serbisu iha ekipa, espíritu sakrifísiu nian no kumprimentu devér nian, ne’ebé horik nafatin iha traballadór sira, tantu nasionál nune’e mós estranjeiru-sira, ne’ebé habelar iha setór oioin hosi Timor-nia ekonomia no administrasaun públika, ne’ebé kontribui maka’as ba produtividade no atu nasaun Timor-Leste hakat ba oin iha ritmu ne’ebé di’ak.
Traballadór sai nu’udar bensaun no rikusoin loloos ida hosi família, komunidade, empreza, instituisaun ka nasaun ida, justu duni atu selebra ezemplu di’ak liu sira kona-ba serbisu no exelénsia, hanesan fonte enkorajamentu no inspirasaun nian hodi hasoru dezafiu sira husi dezenvolvimentu.
Ba traballadór timoroan no estranjeiru hothotu ne’ebé kontribui ho laran tomak ba Timor-Leste ida-ne’ebé modernu, dezenvolvidu no prósperu liután.
“Ha’u hakarak tebes, hodi ha’u nia naran rasik no Governu nia naran, hato’o ami-nia agradesimentu ne’ebé boot tebetebes ba esforsu no serbisu hotu ne’ebé traballadór-sira halo iha momentu ne’ebé ita luta hela hasoru Surtu Covid-19,” Taur Matan Ruak afirma.
Jornalista : Antónia Gusmão
Editór : Cipriano Kolo
