DILI, 10 maiu 2021 (TATOLI)—Xefe Bankada Kmanek Haburas Unidade Nasionál Timor Oan (KHUNTO), Deputada Olinda Guterres, seidauk simu vasina tanba enfrenta tensaun.
Deputada Olinda Guterres hateten, vasina ne’e balun vasina tiha maibé COVID-19 ne’e kona nafatin.
Notísia Relevante: Funsionáriu PN na’in-14 pozitivu COVID-19
“Ha’u ida tensaun tún-sa’e ne’e, ema labele obriga ha’u. Estadu mós labele obriga ha’u-nia mate. Ha’u kuandu mate to’o Nai Maromak nia oin fó-sala ba ha’u, tanba ha’u oho ha’u-nia aan. Ita boot sira-ne’ebé hakarak tuir, bele tuir, maibé labele obriga. Ema-ne’ebé laiha moras bele tuir, ha’u latuir ida,” Deputada Olinda Guteterres, deklara liuhosi plenária, segunda ne’e.
Deputada Olinda Guterres ko’alia kestaun ne’e hafoin Deputadu Bankada FRETILIN, Antoninho Bianco, fó-sai iha plenária katak deputadu balun seidauk simu vasina.
“Deputadu sira balun vasina ona ka seidauk, tanba ita atu hatudu ba povu tanba ita labele lori fali virus hadaet ba povu simples. Ita la’ós imune (imunidade) ba virus ne’e, tanba ne’e di’akliu membru órgaun soberanu sira tenke vasina, ne’e ha’u-nia hanoin,” nia fó hanoin.
Entretantu, deputadu sira balun hosi Bankada CNRT mós seidauk simu vasina tanba fó opurtunidade ba liña frente sira simu vasina uluk.
Jornalista: Evaristo Soares Martins
Editór: Cancio Ximenes
