DILI, 11 maiu 2021 (TATOLI)—Sekretáriu Estadu Protesaun Sivíl (SEPS), Joaquim Gusmão, apela ba komunidade atu kumpre nafatin regra prevensaun COVID-19, bainhira simu apoiu umanitáriu ne’ebé Governu oferese.
Regra prevensaun COVID-19 tuir Ministéiru Saúde (MS) no Organizasaun Mundiál Saúde (OMS), maka uza máskra, fase liman bebeik ka dezinfektante ho hand sanitizer no distánsia sosiál.
Notísia relevante:SEPS oferese apoiu emerjénsia ba família 1.371 iha Kampung Alor
“Família sira favór kumpre nafatin regra prevensaun tanba númeru kazu pozitivu COVID-19 kontinua aumenta kada loron,’’ Joaquim Gusmão hato’o apelu ne’e, bainhira distribui apoiu emerjénsia ba família afetadu inundasaun iha sede suku Kampung Alor, Dili, tersa ne’e.
Xefe suku Kampung Alor, Alcina Carvalho Santos, konsidera apelu ne’e importante tebes tanba, bele tulun diak liu komunidade, nune’e prevene transmisaun COVID-19.
Nia mós husu ba komunidade ne’ebé ho idade 60 ba leten ho moras króniku atu partisipa iha programa vasina ne’ebé Ministéiru Saúde lansa ona.
Tuir observasaun jornalista Agéncia Tatoli, iha sede Suku Kampung Alor, katak, distribuisaun apoiu emerjénsia ba família afetadu, halibur ema barak ne’ebé hotu-hotu uza máskara, autoridade suku mós prepara bee ho sabaun no hotu-hotu fase liman, maibé laiha distánsia sosiál.
Iha 05 maiu, Governu liuhosi reuniaun Konsellu Ministru (KM), aprova projetu Rezolusaun Governu númeru 45/2021, loron 29 abríl, ne’ebé impoin fila-fali konfinamentu domisiliáriu jerál ba populasaun Munisípiu Dili, hodi permite sidadaun rezidente, esesionalmente, bele sai hosi uma hela fatin inklui sentru akollimentu, hodi asesu ba apoiu sósio-ekonómiku ne’ebé prevee iha lei númeru 8/2021,loron 03 maiu.
Jornalista: Nelson de Sousa
Editór: Cipriano Colo
