DILI, 13 maiu 2021 (TATOLI)—Koordenadór Pilar III, Ministériu Saúde (MS), Carlito Correia Freitas, hateten hahú hosi 1 to’o 10 maiu, ekipa saúde hala’o sentinela ativa ba área risku iha postu administrativu haat iha Dili, deteta kazu pozitivu COVID-19 hamutuk 181, hosi amostra 1.874.
Área risku-sira iha postu administrativu haat kompostu hosi Dom Aleixo, Vera Cruz, Na’in-Feto no Cristo Rei, liuliu iha suku 12 mak hanesan Fatuhada, Bebonuk, Mahodi, Manleuana, Bairru-Pité, Becora, Kuluhun, Vila Verde, Caicoli, Lahane Osidentál, Santa Cruz no Lahane Orientál.
Notísia relevante:SnF kontinua hala’o sentinela ativa iha Dili
“Hosi amostra 1.874, ita deteta pozitivu COVID-19 hamutuk 181. Signifika 9,6% entre ema na’in-sanulu, ita tenki hetan na’in-ida pozitivu,’’ Carlito Correia Freitas, hateten ba jornalista Tatoli via telefónika, kinta ne’e.
Nia esplika, sentinela ativa ne’e depende ema mai, tanba atividade ne’e voluntáriu no la’ós obrigatóriu.
Tanba ne’e, tuir dadus, suku Vila Verde númeru pozitivu barak liu, tanba ema mai barak duni hodi halo teste swab hamutuk 868, no detetadu pozitivu na’in 31.
Alende ne’e, dadus mós hatudu katak, iha postu administrativu haat ne’e, amostra barak liu iha Dom Aleixo no amostra oitoan liu maka iha postu administrativu Na’in-Feto hamutuk 214 no detetadu pozitivu na’in 21.
Difikuldade ne’ebé ekipa saúde hasoru iha terrenu durante hala’o sentinela ativa mak hanesan, partisipasaun komunidade mínimu tebes, tanba ekipa ba hein oras ida to’o rua, foin mak ema ida ka rua ho voluntariamente hakarak teste swab.
Mekanizmu ne’ebé ekipa saúde uza maka, utiliza antigen rapid test, signifika halo teste iha fatin durante minutu 15 rona kedan rezultadu.
“Maibé, ita haree ida ne’ebé mak pozitivu, ita asegura kedan, lori ba izolamentu ka refere atu halo auto izolamentu ne’ebé tenki halo pedidu ofisiál ba Ministra Saúde, bainhira hetan aprovasaun mak bele halo autoizolamentu. Amostra ka rezultadu teste swab ne’e mós ekipa asegura, hodi halo konfirmasaun ba PCR iha Laboratóriu Nasionál Saúde,’’ Carlito Correia Freitas hateten.
Durante loron sanulu ekipa saúde ne’ebé halo sentinela ativa iha Dili hamutuk na’in 70-resin, kompostu hosi médiku, enfermeiru, motorista no tékniku Laboratóriu Nasionál Saúde.
Jornalista: Felicidade Ximenes
Editór: Cipriano Colo
