Kada loron, abitante uma-kain 700 husu ai-han ba Madre Kanosiana

DILI, 17 maiu 2021 (TATOLI)-Abitante uma-kain entre 350 to’o 700, kada loron, sempre hakbesik ba Konventu Madre Kongregasaun  Fillas ba Karidade Kanosiana (FDCC, sigla Portugés) iha Balide, Dili, hodi husu apoiu ai-han.

Notísia Relevante : Arkedioseze Díli Apoia Família 7.000-Resin Durante Situasaun COVID-19

Madre Guilhermina Marçal, haktuir ba Agência Tatoli, segunda ne’e, iha Konventu FDCC, Balide, Dili, katak dezde dezastre naturál iha 04 abríl liubá to’o ohin loron, abitante-sira,  kompostu hosi inan-aman no labarik-sira no estudante-sira ne’ebé hela iha “kost” sempre ba iha konventu hodi husu ajuda ai-han tanba sira-nia moris susar tebetebes.

“Dezde akontese kalamidade iha loron 04 abríl liubá to’o ohin loron, hahú kedas iha loron 07 abríl, ami fó apoiu ba vítima dezastre naturál to’o agora,” Madre Guilhermina Marçal hateten.

Kada loron to’o ohin loron, Madre Guilhermina Marçal hateten, sira la’ós simu de’it vítima dezastre naturál atu fó apoia nesesidade báziku, maibé  atende mós família kbiit-laek-sira ho estudante-sira hela iha “kost” mai husu foos, mina no ai-han nesesidade bázika nian.

“Loron ida ami bele atende kada xefe família másimu 700 no mínimu 350, maibé ida ne’e seidauk konta ba estudante-sira ne’ebé hela iha uma aluga ka “kost” mai simu hotu nesesidade báziku iha ami,” Madre Guilhermina Marçal  haktuir.

Nia hatutan, bainhira seidauk akontese kalamidade, serka sanitária no konfinamentu obrigatóriu FDCC Balide kada semana fó apoiu nesesidade báziku ba ema kbiit-laek másimu ema na’in sanulu, maibé hafoin akontese kalamidade no aumenta konfinamentu obrigatóriu no serka sanitária iha Munisípiu Dili, dadersán tuku 07:00 Otl de’it ema nakonu ona odamatan ka portaun FDCC, Balide.

“Dadersán ami sai hosi misa, ami-nia portaun ema nakonu ona, dala ruma ami dehan, ba sira hahán laiha, maibé sira hamriik nafatin dehan ami hamlaha, liafuan ida-ne’e halo ita nu’udár umanu hanoin sira, entaun buat ne’ebé ami fó sira tuir kbiit ne’ebé ami iha, hanesan foos, batar, mina no supermi,” Madre Guilhermina hateten.

Nia esklarese, maneira fahe apoiu nesesidade báziku ba abitante sira mak, kada ema atu simu nesesidade báziku tenke lori fixa família, no estudante bele lori kartaun estudante. Objetivu husu fixa família no kartaun estudante atu komunidade labele bosok, simu dala rua, tanba situasaun agora ne’e ema hotu presiza ai-han.

Nia afirma, nesesidade báziku ne’ebé kada loron FDCC apoiu ba abitante sira, mai hosi ema laran luak balun, individuál  no grupu balun, hosi sira ne’e balu mai lori osan no balu mai ho sasán, nune’e FDCC rasik hasai tan osan aumenta hodi lori prepara ai-han sira ne’e.

“Kona-ba ba apoiu hahán, ami fahe fulan ida loron sanulu ona, maibé hosi Governu liuhosi Ministériu Solidariedade Sosiál no Inkluzaun, (MSSI), foin mai fó apoiu dala ida ho foos saka 100 ne’ebé foos ne’e ami fahe loron ida de’it hotu ona to’o agora seidauk apoiu tan, entaun ami mak esforsu rasik buka fó apoiu ba maluk sira, no osan ne’ebé loroloron ami ba sosa ai-han mai fahe fali ba maluk sira to’o agora  ami gasta ona hamutuk $18.000, maibé ida ne’e seidauk to’o, tanba loro-loron ema mai hela de’it,” nia tenik.

Nia salienta, abitante-sira ne’ebé loroloron ba simu nesesidade báziku iha FDCC ne’e mai kuaze fatin sira iha Dili laran. Tanba ne’e, nia husu ba Governu iha situasaun agora, aplika serka sanitária no konfinamentu obrigatóriu nia di’ak atu povu labele mate ba COVID-19, maibé mós tenke kria kondisaun ba povu nune’e povu mós labele mate ba hamlaha.

Mariana da Costa, nu’udar abitante Camea ne’ebé simu ai-han hosi Madre-sra FDCC hateten, nia agradese tebes ba Madre Kanosiana, Balide tanba iha tempu susar ida-ne’e Madre-sira bele ajuda ona nia ho nia família atu hetan netik ai-han.

Tuir observasaun Agência Tatoli iha terrenu nota katak, maske ema barak ne’ebé nakonu iha konventu FDCC, Balide, atu simu nesesidade báziku, maibé abitante-sira nafatin kumpre protokolu prevensaun COVID-19 nian hanesan uza máskara no distánsia fíziku.

Jornalista       : Arminda Fonseca

Editór             : Francisco Simões