DILI, 23 maiu 2021 (TATOLI)—Ministériu Edukasaun Joventude no Desportu (MEJD), liu hosi Diretór Nasionál Asaun Sosiál Eskolár (DNASE), Joaquim Martins, husu dirijente eskola-sira ne’ebé iha planu atu halo limpeza, liuliu eskola sira ne’ebé afetadu ba inundasaun, tenke koordena ho parte ministériu.
Joaquim Martins, esplika, bainhira parte eskola iha inisiativa atu limpeza, laiha problema, importante iha koordenasaun ho MEJD, tanba oras-ne’e daudaun Timor-Leste (TL) iha hela situasaun Estadu emerjénsia.
Notísia relevante:MEJD adia programa limpeza ba eskola neen
“Bainhira dirijente-sira iha inisiativa hakarak hamós sira-nia eskola, ne’e di’ak liu-tan, maibé tenke halo koordenasaun uluk ho MEJD, hodi rezolve asuntu ruma, molok hala’o limpeza,” Joaquim Martins, hateten ba Agência Tatoli, via telefónika domingu ne’e.
Iha sorin seluk, Diretór eskola Ensinu Sekundáriu Jerál (ESG sígla portugés) 5 maiu, Manuel Verdial, hateten, hahú segunda (24/05/21) sei aprezenta karta ba MEJD atu husu lisensa, hodi halo limpeza ba edifísiu eskola ne’ebé iha sala-de-aula hamutuk sia mak to’o oras-ne’e sei nakonu ho tahu.
“Aban, ha’u sei haruka karta ba MEJD atu hetan lisensa hodi halo limpeza. Ha’u sei husu ba komunidade ne’ebé besik eskola mak hamós. Ha’u sei prepara sira-nia nesesidade ba limpeza,” nia hateten.
Entretantu, iha 04 maiu 2021, MEJD la konsege realiza programa limpeza ba eskola neen (6) iha kapitál Dili ne’ebé afetadu ba inundasaun iha 04 abríl, tanba Governu deside implementa konfinamentu obrigatóriu.
Eskola neen ne’ebé tama ona iha alvu MEJD atu hetan limpeza mak hanesan, eskola Ensinu Sekundáriu Jerál 5 maiu, eskola EBC Sérgio Vieira de Melo Becora, eskola ESG Hera, eskola ESG 4 setembru, eskola EBC Manleuana no Eskola Sekundáriu Tékniku Vokasionál (ESTV) Hera.
Jornalista: Tomé Amado
Editór: Cipriano Colo
