DILI, 24 maiu 2021 (TATOLI)--Ministériu Turizmu, Komérsiu no Indústria (MTKI) liuhosi Diresaun Jéral Indústria hamutuk Diresaun Nasionál Apoiu Dezenvolvimentu Mikro, Pequena no Média Empreza hamutuk ho entidade relevante, hahú halo avaliasaun proposta hosi empreza hamutuk 22 ne’ebé hakarak asesu garantia kréditu ho funan 3%.
“Hosi proposta ne’ebé submete ba Sekretariada Nasionál Programa Negósiu Sosiál, ekipa deside proposta lima hosi empreza mikro, pequena no média mak liu,” refere nota ne’eé Agência TATOLI asesu, segunda ne’e.
Hosi avaliasaun daruak ne’e, ikus liu ekipa aprova proposta rua tanba prienxe rekezitu hosi MTKI, enkuantu proposta tolu seluk la prienxe rekezitu.
Nune’e, proposta tolu hetan rejeisaun no proposta 14 maka sei iha meza Sekretáriada Nasionál no sei subemete ba komisaun avaliasaun hodi bele avalia iha tempu badak.
Aleinde, komisaun sira fó rekomendasaun ba empreza sira ne’e atubele hadi’a liután negósiu iha parte produsaun, merkadu no mós tenke iha relatóriu finanseiru.
Iha enkontru dahuluk, komisaun avaliasaun proposta konsege aprova proposta tolu no hamutuk ho proposta rua ne’ebé aprova sei submete ba Banku Nasionál Komérsiu Timor-Leste (BNCTL, sigla portugés) iha tempu badak hodi prosesa ba asesu grantia kréditu.
Ekipa mós sei kontinua simu proposta husi empreza mikro, pequena no média, ne’ebé hakarak asesu ba fasilidade garantia kréditu ho funan 3%.
Iha tinan kotuk, MTKI no Programa Nasaun Unida ba Dezenvolvimentu (PNUD) deside trasfere fundu hamutuk $480.000 ba BNCTL, ne’ebé hanesan implementadór atu fasilita programa ne’e.
Programa ne’e sei foku liu ba emperza sira ne’ebé hala’o negósiu iha área agrikultura, turizmu, pekuária, peska, indústria no komérsiu hodi kria mós kampu traballu iha Timor-Leste.
Antes ne’e, Diresaun Nasionál Apoiu Dezenvolvimentu Mikro Pekena Empreza, liuhosi Sekretáriada Programa Negosiu Sosiál simu ona proposta hamutuk 22 ne’ebé ekipa avaliasaun aprova proposta lima.
Avaliasaun proposta daruak ba fasilidade garantia kréditu lidera hosi Diretór Nasionál Apoiu Dezenvolvimentu Mikro, Pequena no Média Empreza, Bernardino Menezes, modera hosi Silvia C. de Araujo.
Komisaun avaliasaun proposta kompostu husi Diretór Jerál Indústria MTKI, Carlos Lopes Ximenes, Diretór Ezekutivu Institutu Apoiu Dezenvolvimentu Emprezariál (IADE), Filomeno Marcelino Belo, Reprezentante hosi PNUD, Abrão P. Soares, ne’ebé konsege aprova proposta rua hosi proposta lima ne’ebé submete.
Jornalista: Florêncio Miranda Ximenes
Editora: Julia Chatarina
