DILI, 25 maiu 2021 (TATOLI)—Partidu istóriku Frente Revolucionária de Timor-Leste Independente (FRETILIN), hahú prepara-aan molok reune estrutura sira iha baze hafoin konvoka kongresu estraordinária hodi hasoru eleisaun prezidensiál no parlamentár.
“Ami prepara ona tanba tuir loloos ne’e Comite Central FRETILIN reune tiha ona maibé tanba serka sanitária ne’e ita tenke respeita, entaun seidauk bele realiza. Prosesu ida-ne’e tenke ultrapasa, to’o setembru tenke reune hosi baze to’o nasionál. Ami tenke define estrutura sira-ne’e hotu depois konvoka kongresu estraordináriu hodi hasoru eleisaun prezidensiál no parlamentár,” Vise Prezidente Partidu FRETILIN, Francisco Miranda Branco, informa ba jornaalista sira, iha resintu Parlamentu Nasionál, tersa ne’e.
Nia espera katak, programa vasinasaun doze baruak bele fó esperansa ba povu Timor-Leste nune’e prepara-aan ba festa demokrasia.
“Ami hanoin katak depois segunda doze vasina ne’e, ami mós bele tún ona ba baze tanba persentajen vasina ne’e aumenta to’o 50% entaun loke dalan ona ba movimentu polítiku bele fásil liu ona. Tanba iha haree nasaun sira seluk to’o ona 60%, ne’e sira loke ona espasu ba movimentu sira-ne’e,” nia dehan.
Comite Central Fretilin (CCF) sei aprova uluk ajenda hafoin tún ba baze hodi hametin estrutura hosi aldeia, suku, postu administrativu no munisípiu.
Partidu FRETILIN oras ne’e hamutuk ho Partidu Libertasaun Populár (PLP) no Kmanek Haburas Unidade Nacional Timor Oan (KHUNTO) lidera hela VIII Governu Konstitusionál. Partidu tolu ne’e lidera VIII Governu liuhosi Plataforma Entendimentu ne’ebé hala’o iha Hotel Timor.
Jornalista: Evaristo Soares Martins
Editór: Cancio Ximenes16:49:17
