DILI, 30 maiu 2021 (TATOLI)–Ministériu Petróleu no Minerál (MPM) no Autoridade Nasionál Petróleu no Minerál (ANPM) hahú prepara ekipa atu halo diseminasaun Lei Kódigu Mineiru, bainhira lejizlasaun ne’e hetan ona promulgasaun hosi Prezidente Repúblika, Francisco Guterres ‘Lú Olo’.
Ministru Petróleu no Minerál, Víctor da Conceição Soares, hateten, elaborasaun lejizlasaun ne’e liu ona presesu naruk, hahú 2016 to’o 2021 mak foin hetan aprovasaun unanimidade tanba hetan apoia maka’as hosi bankada Governu no Opozisaun ne’ebé haree ba interese nasionál.
“Ami hahú halo prosesu redasaun finál, nune’e tempu besik submete ba Prezidente Repúblika no kuandu promulga, ami hahú sosializasaun tuir lei haruka durante fulan-tolu ba Timór laran tomak hamutuk ho Autoridade Nasionál Petróleu no Minerál,” Ministru Víctor informa ba Agência TATOLI, iha edifísiu Ministériu Finansa, Aitarak-laran, domingu ne’e.
Notísia relevante: PN aprova projetu-lei kódigu mineiru ho unanimidade
Projetu-Lei númeru 4/V(1a) Kódigu Mineiru ne’e aprovadu iha finál global iha loron 24 maiu 2021, ho rezultadu votasaun a-favór 56, laiha kontra no abstensaun.
Tuir Governante ne’e, hafoin disemina ona mak bele halo ezekusaun programa tanba empreza nasionál no internasionál balun iha ona interese halo investimentu iha setór minerál.
“Daudaun ne’e, ANPM prepara hela Rezolusaun Governu atu fó ona lisensa balun ba kompañia sira ne’ebé hein Lei Kódigu Mineiru durante tinan barak ona, atubele hahú produsaun mineirál sira hodi hatama reseita ba Timor-Leste,” nia akresenta.
Ministru garante, liuhosi Kódigu Mineiru ne’e, Estadu bele hetan reseita hosi potensiál rekursu minerál sira, liu-iu riku-soin sira ne’ebé iha rai maran.
Governu fó importansia ba lejizlasaun ne’e tanba durante tinan 20 nia laran, Estadu nia fonte finanseiru depende de’it ba fundu mina-rai.
“Ita-nia mina-rai komesa menus daudaun no reseita mós menus ona, tanba ne’e Lei Kódigu Mineiru rasik fó alternativa hodi hasa’e kreximentu fundu minerál atu ita labele depende de’it ba mina-rai maibé setór seluk mós,” nia subliña.
Tuir Ministru, Kódigu Mineiru importante ba país ne’e no otimizta sei fó reseita di’ak.
Projetu-lei kódigu Minieru hamutuk artigu 162 ho kapítulu 20 no anexu tolu, ne’ebé iha artigu ida define aprovasaun, artigu tuir mai deskreve polítika mineira, artigu seluk objeitvu sira kona-ba estratéjia setór minieru no ikus liu artigu 162 define dispozisaun tranzitóriu.
Lei ne’e sei vigora bainhira kompleta ona loron 180, ne’ebé públika hosi Jornál Repúblika.
Iha anexu I define klasifikasaun minerál kompostu hosi mineiru metáliku, jemas (gemas), mineiru radiuativu, rochas no minerál industriál, karvaun no mineiru de terras raras, anexu II kona-ba taxa hosi royalty mineiru no anexu III define renda superfísie.
Jornalista: Florêncio Miranda Ximens
Editora: Julia Chatarina
