DILI, 01 juñu 2021 (TATOLI)-–Sekretaria Estadu Ambiente (SEA) hamutuk ho ekipa hosi Ajénsia Nasionál Lisensiamentu Ambientál (ANLA) halo inspesaun ba konstrusaun edifísiu ETO Tower, Colmera.
Sekretáriu Estadu Ambiente, Deométrio do Amaral de Carvalho, hateten, inspesaun prévia ne’e hanesan avaliasaun atu emite lisensa ambientál.
“Ami halo inspesaun prévia ba konstrusaun edifísiu ETO Tower, ne’ebé hanesan sentru komersiál ne’ebé estratéjiku iha sidade Dili no ETO rasik husu atu fó lisensa ambietál. Tanba ne’e, daudaun ita halo avaliasaun no tempu badak ita emite ona,” Sekretáriu Estadu hateten hafoin halo inspesaun, tersa ne’e.
Hafoin hala’o atividade, governante ne’e nota katak konstrusaun edifísiu ne’e tuir kritéria ambientál, nune’e iha inisíu fulan-juñu bele ona emite ona lisensa ambientál.
Tuir nia, objetivu inspesaun atu kompleta avaliasaun hodi ajusta komentáriu tékniku sira atubele ajuda empreza halo mitigasaun problema ambientál sira ne’ebé posível mosu iha futuru no estratéjia ba jestaun ambiente di’ak liu iha futuru.
Tuir planu, edifisiu ne’e instala tratametu rezíduu sólidu no líkidu iha resintu edifísiu no instala solár painél atu ajuda iluminasaun plástiku maizumenus 15%.
“Ami-nia observasaun dokumentu ne’ebé submete hosi konsultór WIKA, kontrata hosi empreza ETO hatudu prenxe duni kritéria atu hetan lisensa ambientál,” nia akresenta.
Iha biban hanesan, Diretór Ezekutivu Esperansa Timor-oan (ETO), Nilton Gusmão, hateten konstrusaun edifísiu ne’e kuaze konklui.
“Konstrusaun to’o ona 70%, ne’ebé iha nível estrutura nian prosesu la’o neineik tanba hasoru hela situasaun pandemia COVID-19, ne’ebé halo mobilizasaun ema nia difísil oituan, maibé ami nafatin kompremetidu halo investimentu,” Nilton hatutan.
Nune’e, Emprezáriu ne’e kontinua hatudu kompromisu hodi halo investimentu to’o ramata hodi loke kampu traballu ba timor-oan no kontribui ba dezenvolvimentu Ekonómiku.
”Ita hakarak edifísiu ne’e iha Timor-Leste atu hamosu liután espasu komersiál iha ita-nia rai, nune’e investidór ruma bainhira mai bele hetan espasu hodi halo investimentu,” nia subliña.
Nune’e, Dirijente ne’e agradese ba SEA halo inspesaun hodi bele hetan lisensa ambientál no garante sei kumpre regra jestaun no ambiente.
“Ami hein katak bele hetan lisensa tanba ami kumpre regra sira atu halo jestaun ba ambiente iha edifísiu ne’e,” nia tenik.
Tuir planu, konstrusaun edifísiu iha sentru sidade Dili ne’e sei presiza tinan-ida ho fulan ualu tan atu finaliza konstrusaun ho andar sia.
Jornalista: Florêncio Miranda Ximenes
Editora: Julia Chatarina
