DILI, 02 juñu 2021 (TATOLI)—Governu liuhosi Ministériu Interiór (MI), sei entrega karreta hamutuk 21 ba instituisaun Polísia Nasionál Timor Leste (PNTL) iha tempu badak.
Vise-Ministru Interiór, António Armindo hamutuk ho Komandante Jerál PNTL halo ona inspesaun direta ba karreta operasaun foun hirak ne’ebé para ona iha aredór Komandu Jerál Caicoli, kompleta ho fasilidade hanesan rádiu komunikasaun no sirene.
Notísia relevante:PNTL kontinua jere rekursu asegura eleisaun Prezidensiál-Parlamentár
António Armindo hateten, parte Diresaun Nasionál Lojístika no Gabinete Inspesaun Jerál, Ministeriu Interiór-nian halo hela rejistu hodi sertifika kondisaun ba patrimóniu, sei rejistu hodi hetan xapa matríkula no dokumentu-sira.
Governante ne’e hatutan, transporte hirak-ne’e Governu sosa hodi fó apoiu ba atividade operasaun PNTL hosi nasionál to’o komandu munisipiu-sira.
Liuhosi inspesaun ne’e Ggovernu bele haree direta kona-bá baze de dadus liuliu uzu veíkulu tomak ne’ebé rejista, nune’e bele mantein efisiente no efikasia prosedimentu jestaun patramóniu atu rejistu.
Tuir planu, Vise-Ministru ne’e sei koordena ho Ministru Interiór, atuál Primeiru Ministru (PM), Taur Matan Ruak, atu sosa tán karreta hamutuk 25 iha tinan oin.
“Ita mai hare rasik kondisaun karreta ne’ebé tuir planu Komandu Jerál sei distribui ba postu polísia no eskuadra-sira ne’ebé seidauk iha karreta. Karreta hirak-ne’e seidauk to’o no politikamente MI hamutuk ho PNTL sei hare atu sosa tan karreta 25 iha tinan oin,” nia hateten ba jornalista-sira iha Komandu Jerál PNTL Caicoli, kuarta ne’e.
Iha fatin hanesan, Komandante Jerál PNTL, Komisáriu Polísia, Faustino da Costa, agradese ba Governu ne’ebé kontinua apoia transporte hodi utiliza ba operasaun lorloron.
Komandante PNTL ne’e apela ba komandu munisípiu no eskuadra-sira ne’ebé sei simu karreta, utiliza ho kuidadu durante serbisu.
Antes ne’e, Komandante Komandu Administrasaun PNTL, Superintendente Xefe José Soares, dehan karreta 21 ne’e sosa ho Orsamentu Jerál Estadu (OJE) 2021, maibé nia parte la lembra totál orsamentu.
Karreta hilux 21 ne’e, Komandu Jerál entrega uluk ona rua ba Komandu Munisípiu Dili no rua ba Unidade Espesiál Polísia (UEP).
Jornalista: Eugénio Pereira
Editór: Cipriano Colo
