DILI, 02 juñu 2021 (TATOLI)—Governu liuhosi reuniaun Konsellu Ministru (KM) atribui podér tomak ba Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ba negosiasaun akordu ho Governu Repúblika Populár Xina.
Akordu faze daruak ne’e ba projetu demonstrasaun Ttansmisaun televizaun dijitál ka Digital Television Terrestrial Multimedia Broadcasting (DTMB) iha Timor-Leste.
Notísia relavante: Governu Xina komprometidu kontinua ajuda tékniku RTTL,E.P asegura dijitalizasaun
“Projetu ne’e hahú ona iha inísiu tinan 2019 no agora hakarak haluan projetu no aumenta kobertura nasionál televizaun dijitál terrestre ho instalasaun liután estasaun emisór,” Ministru Prezidénsia Konsellu Ministru, Fidelis Manuel Leite Magalhães, hateten hafoin reuniaun ezekutivu iha salaun Ministériu Finansa (MF), Aitarak-laran, kuarta ne’e.
Iha loron 16 fevereiru 2021, Governu lansa ona sistema dijitalizasaun Rádiu Televizaun Timor-Leste, Empreza Públika (RTTL, E.P) iha suku Guiço, postu administrativu Maubara, munisípiu Liquiçá.
Notísia relavante: Lansa sistema dijitalizasaun, PM Taur enkoraja RTTL,E.P dezenvolve-an
Iha Orsamentu Jerál Estadu (OJE) 2021, Governu aloka osan atu aumenta tan torre no iha mós ambisaun katak kuandu buat hotu di’ak to’o tinan 2024, maka kanál RTTL,E.P bele kobre iha territóriu tomak.
Antes ne’e, dijitalizaun ba faze dahuluk RTTL, E.P kobre de’it Dili, Liquiçá no Aileu, nune’e faze daruak no datoluk dijitalizasaun bele kobre iha Timór laran tomak.
Jornalista: Antónia Gusmão
Editora: Julia Chatarina
