ANAAA sei adota sistema avaliasaun-akreditasaun institusionál liuhosi plataforma online
DILI, 09 juñu 2021 (TATOLI)—Ajénsia Nasionál Avaliasaun Akreditasaun Akadémiku (ANAAA), iha pandemia COVID-19 ne’e, sei adota sistema avaliasaun no akreditasaun institusionál ba instituisaun no kursu ba Ensinu Superiór iha Timor–Leste liuhosi plataforma online.
Notísia Relevante: Fulan oin, ANAAA hahú halo avaliasaun no akreditasaun ba instituisaun ualu
“ANAAA sei adota sistema avaliasaun no akreditasaun tuir plataforma mista (online) ba instituisaun ensinu superiór sira. Sira–nia relatóriu sira upload ba google drive no google doc, ami la hasoru malu. Maibé, durante ida-ne’e ami halo enkontru ho sira liuhosi plataforma zoom, sira tuur iha idak–idak nia fatin hakerek sira–nia relatóriu mak upload ba google drive. Ami–nia ajente ofisiál tékniku sira halo revizaun ba sira–nia relatóriu, tantu buat hotu liuhosi plataforma online de’it,” Diretór Ezekutivu ANAAA, Edmundo Viegas, hateten ba Agência Tatoli, iha nia knaar fatin, kuarta ne’e.
Bainhira instituisaun sira–nia relatóriu ramata ona, ANAAA sei konvoka enkontru ho avaliadór ANAAA nian, iha avaliadór nasionál rua (2) no internasional ida (1), ne’ebé kompoen hosi painél ida-ne’ebé sei avalia ba kada kursu ida.
“Aban–bainrua iha avaliasaun avaliadór internasional la mai, vizita hanesan bai–bain, maibé sira komprometidu tiha ona atu partisipa avaliasaun ne’e liuhosi plataforma online nafatin. Ami konfirma tiha ona partisipasaun avaliasaun hosi nasaun haat (4) mak Austrália, Indonézia, Malázia no Filipina,” nia dehan.
Se avaliadór internasionál sira la mai maibé bainhira to’o ba vizita instituisaun, vizita ne’e la’o nafatin tanba avaliadór nasionál na’in-rua (2) ne’e mak sei ba halo vizita no sei ba halo enkontru ho jerente instituisaun sira. Maibé, hanesan situsaun agora la permite atu halibur ema barak, enkuantu vizita no reuniaun la’o nafatin maibé kumpre nafatin regra hosi Ministériu Saúde no Organizasaun Saúde Mundiál (OMS) ni’an.
“Ita halo distansiamentu sosiál no uza másakara. Maibé ita–nia avaliadór internasionál, halo vizita liuhosi plataforma online, nia partisipa iha reuniaun no nia fó nafatin nia kontribuisaun,” nia dehan.
Rekezitu avaliasaun no akreditasaun hosi ANAAA atu halo avaliasaun institusaun ensinu superiór sira-ne’e bazea ba buat rua (2) mak avaliasaun dokumentu no vizita ba instituisaun, no avaliadór sira-ne’e kompostu hosi avaliadór nasionál na’in-rua (2) no internsionál na’in-ida (1) mak sei fó sira nia pontuasaun.
“Meiu ida-ne’e orsida ami sei adota, maibé atu fasilita mós avaliasaun hosi membru painél sira, ami akonsela instituisaun sira prodús mós video,” nia hateten.
Produsaun video ne’e atu grava situasaun real instituisaun ida–idak nian, liu-liu atu hatudu sira–nia situasaun infraestrutura liu-liu laboratóriu no biblióteka. Ida-ne’e mak ANAAA husu ona instutuisaun ida–idak para dokumentu ida-ne’ebé sira upload ba google drive no google doc ne’e prodús mós video ho durasaun minutu 10 ka 15.
“Ho video ne’e atu hatudu ba avaliadór internasionál ne’ebé labele partisipa direta iha terrenu, maibé husu no hatán pergunta no resposta ne’ebé durante vizita ne’e, bele halo liuhusi Zoom no Whatsaap. Para kualidade rezultadu avaliasaun ne’e la do’ok hosi rezultadu avaliasaun, ne’ebé baibain ami halo tinan-tinan,” nia dehan.
Jornalista: Nelia Fernandes
Editór: Cancio Ximenes
