iklan

NASIONÁL, JUSTISA, DILI, HEADLINE, LEI

Kazu Raikotu, defeza konsidera desizaun Tribunál todan liu

Kazu Raikotu, defeza konsidera desizaun Tribunál todan liu

Defensor Públiku, Estaquio Guterres. Imajen/Domingos Piedade.

DILI, 11 juñu 2021 (TATOLI)—Defensór Públiku, Estaquio Guterres, ne’ebé fó asisténsia legál ba arguidu kazu Raikotu, suku Madohi, postu administrativu Dom Aleixo, munisípiu Dili, Lourenço Haulobo, konsidera aplikasaun pena hosi Tribunál Distritál Dili (TDD) ba kliente ne’e todan liu.

“Nu’udár defeza, desizaun ida-ne’e todan teb-tebes tanba arguido-rasik foin primeiza vez mai iha Tribunál no iha pasadu atidude la’ós kriminozu, maibé ho de’it akontesimentu ne’e, derrepente sein kontrola,’’ Estaquio Guterres, hateten ba jornalista Agéncia Tatoli, iha TDD, sesta ne’e.

Notísia relevante:Kazu Raikotu, arguidu tama prizaun tinan 23

Maski krime ne’ebé arguidu komete omisídiu agravadu, maibé Estaquio Guterres  dehan, iha mós istória ne’ebé bele akontese katak, Tribunál bele konsidera faktu ne’ebé arguidu hato’o.

Nia hatutan, faktu sira Tribunál konsidera provadu hotu, maibé hanesan defeza sei haree fila-fali no sei konsulta ho arguidu no família bainhira aseita bele halo rekursu ka la’e.

Iha 09 juñu 2021, TDD foti ona desizaun  liuhosi desizaun koletivu juiz, hodi kondena arguidu Lourenço Haulubo ho pena únika prizaun tinan 23.

Pena únika ne’e tanba arguidu komete kazu omesídiu agravadu, omisídiu tentadu ho arma branka, hamate Domingas Soares, inan hosi vítima Lim di Moy, ne’ebé akontese iha rezidénsia Rai Kotu, aldeia Tera Santa, iha 30 outubru 2020.

Tuir regra prosesuál, desizaun Tribunál iha primeira instánsia ne’e, dentru loron 15 sura hosi despaixu tun, bainhira parte intervienente sira la aseita bele halo rekursu.

Jornalista: Nelson de Sousa

Editór: Cipriano Colo

iklan
iklan

Leave a Reply

iklan
error: Content is protected !!