BOBONARO, 17 juñu 2021 (TATOLI)—Autoridade lokál sira hosi postu administrativu Bobonaro, munisípiu Bobonaro, apoia programa Governu atu halo vasina ba komunidade hodi prevene an hosi COVID-19.
Xefe suku Leber, Joanico da Silva, deklara prontu fó apoiu ba programa ne’e, no prometa sei koordena ho Xefe aldeia-sira, atu fahe informasaun ne’ebé loos, nune’e komunidade bele partisipa másimu hodi simu vasina iha sentru vasinasaun ne’ebé estabelese ona iha suku ho postu saúde-sira.
Notísia relevante:Bobonaro preparadu simu vasina AstraZeneca doze daruak
“Ami sei koordena ho xefe aldeia-sira atu organiza komunidade nune’e bele mai konsentra iha sede suku ka postu saúde hodi simu vasina. Autoridade lokál apoiu 100% tanba programa ne’e esensiál tebes iha situasaun ida-ne’e,” Joanico da Silva hateten ba jornalista Agência Tatoli, iha edifísiu administrasaun munisipál Bobonaro, kinta ne’e.
Nune’e mós Xefe Suku Kolimau, Arménio Guterres Moniz, hateten, hanesan autoridade lokál prontu fasilita atu esplika ba komunidade kona-bá importánsia hosi vasina ne’e, maibé iha implentasaun depende mós ba konsiénsia hosi komunidade.
Tuir sensus populasaun 2015, postu administrativu Bobonaro ne’ebé iha suku 18 ho totál abitante hamutuk 24.719, feto na’in 12.585 no mane 12.134.
Programa Vasina ba doze dahuluk iha munisípiu Bobonaro, ema na’in 1.239 mak simu ona AstraZeneka, enkuantu iha doze daruak hahú ona iha segunda 14 juñu 2021.
Jornalista: Sérgio da Cruz
Editór: Cipriano Colo
