DILI, 18 juñu 2021 (TATOLI)—Governu liuhosi Ministériu Solidariedade Sosiál no Inkluzaun (MSSI) ho Embaixadór Estadu Unidu Amérika (EUA), Charles Kevin Blackstone, nafatin iha kompromisu hodi fó apoiu ba programa merenda eskolár iha Timor-Leste liuhosi programa HATUTAN (Hahan ne’ebé fó tulun ho Nutrisaun no Edukasaun).
Charles Kevin Blackstone hateten, Estadu Unidu Amerika (EUA) sei konitnua fó apoiu ba programa merenda eskolár ba estudante iha eskola sira iha Timor-Leste ho valor orsamenu $40.000.
Notísia Relevante: Care International kontinua implementa programa HATUTAN
“Bianhira eskola tama fali ona, ami sei fornese no fó asisténsia ba programa merenda eskolár ho osan hamutuk $40.000 ba estudante ne’ebé presiza tebes merenda eskolár ne’e. Programa hirak ne’ebé hala’o ne’e, EUA koopera no halo kolaborasaun ho ministériu relevante sira no sira-ne’ebé oferese merenda eskolár ne’e,” Kevin Blackstone hateten ba jornalista sira hafoin hasotu malu ho Vise Primeiru Ministru no Ministra Solidariedade Sosiál no Inkluzaun (MSSI), Armanda Berta dos Santos, iha edifísiu MSSI, Caicoli, Dili, sesta ne’e.
Apoiu ne’ebé Estadu Unidu Amerika (EUA) oferese ba povu Timor-Leste ne’e iha kolaborasaun ba programa prioridade hosi VIII Governu Konstitusionál ne’ebé estabelese ona.
Aleinde ne’ee, nia dehan, daudaun ne’e programa rua ne’ebé la’o hela mak violénsia bazea jéneru ne’ebé sei hala’o iha munisípiu sira hotu mak ho programa armónia, no programa seluk mak ko’alia kona-ba relasaun saudável hodi nune’e atinje futuru ne’ebé livre hosi violénsia.
Programa HATUTAN lansa ofisiálmente iha loron 11 fulan-juñu tinan 2019 ho objetivu atu hadi’a edukasaun, nutrisaun no saudé iha eskola hamutuk 440 no komunidade ne’ebé hela besik eskola sira ha Munisípiu Ermera, Liquiça, Ainaro no Manatuto liuhosi apoiu ba agrikultór sira hodi hasa’e produsaun produtu lokál sira, atu ho forma ida-ne’e bele hasa’e rendimentu agrikultór sira-nian no kria fonte sustentavel hosi ai-han sira-ne’ebé iha nutrisaun ba eskola lokál sira.
Programa HATUTAN lansa bazea ba nota entendementu ne’ebé asina hamutuk ho Ministériu Edukasaun, Juventude no Desportu (MEJD) durante tinan lima (5) ne’ebé hahú hosi 2019-20123. Programa ne’e lidera hosi Care Inernasional ho estimasaun kustu millaun $26 ne’ebé implementa liuhosi konsórsiu entre Care Internasional, Ajénsia Mercy Corps no Water Aid liuhosi parseria MEJD, Minsitériu Saúde, Minsitériu Administrasaun Estatál no Ministériu Agrikultura no Peska.
Jornalista: Osória Marques
Editór: Cancio Ximenes
