iklan

EKONOMIA, HEADLINE

MAP planeia fasilita kréditu ba agrikultór enkoraja hasa’e produsaun

MAP planeia fasilita kréditu ba agrikultór enkoraja hasa’e produsaun

Natar iha Atabae. Imajen Tatoli/António Gonçalves

DILI, 21 juñu 2021 (TATOLI)–Diretora Jerál Ministériu Agrikultura no Peska (MAP), Odete Maria do Ceu Guterres, hateten, parte ministériu planeia atu fasilita kréditu ba agrikultór sira hasa’e produsaun rai-laran.

“Ita hakarak ita-nia agrikultór sira iha independénsia, labele depende de’it ba Governu, tanba ne’e ita iha hanoin atu fasilita kréditu,” Diretora informa ba Agência TATOLI, iha  ninia knaar fatin, MAP Comoro, segunda ne’e.

Daudaun ne’e MAP halo hela traballu atubele implementa programa ne’e iha tinan oin.

“Ami halo hela traballu ida-ne’e no sei identifika área potensiál ne’ebé bele sai ezemplu, ita identifika área pontensiál ne’ebé agrikultór bele selu kréditu no ita sei fó hahú funan kiik to’o bo’ot  karik buat hotu la’o diak, ita espera katak tinan oin ita bele implementa,” nia akresenta.

Ba kestaun ne’e, MAP sei kolabora ho parseiru dezenvolvimentu hodi hamutuk haree ba asuntu ne’e.

“Ami serbisu hamutuk ho ami-nia parseiru dezenvolvimentu sira hodi haree métodu ida-ne’ebé maka di’ak, nune’e bele aplikável no adaptável atu ita labele fó todan ba ita-nia agrikultór sira,” nia hatutan.

 Jornalista : Natalino Costa

Editora      : Julia Chatarina

iklan
iklan

Leave a Reply

iklan
error: Content is protected !!