DILI, 23 juñu 2021 (TATOLI)— Timor-Leste (TL) kontinua sente konfiante no seguru kona-bá desizaun atu administra AstraZeneca ba populasaun ho idade 18 ba leten, tuir rekomendasaun hosi péritu Organizasaun Mundiál Saúde (OMS).
Ministra Saúde, Odete Maria Freitas Belo deklara asuntu ne’e, relasiona ho publikasaun hosi média balun katak, desizaun Governu Austrália autoriza de’it vasina AstraZeneca ba ema ho idade 50 ba leten.
Notísia relevante:Governu presiza klarifika informasaun kontrovérsia kona-bá AstraZeneca
Deklarasaun ne’e fó-sai hafoin Ministra Saúde (MS) konvoka reuniaun emerjénsia ho representante Embaixada Austrália, Organizasaun Mundiál Saúde (OMS), UNICEF no President National Immunization Technical Advisory Group (NITAG), ne’ebé diskuti kle’an kona-bá impaktu hosi notísia ne’e ba kampaña vasinasaun iha TL no buka meiu atu fó esklaresimentu konjuntu ba populasaun tomak.
”Hare’e ba vasina AstraZeneca ne’ebé fornese ona doze millaun 500 ba nasaun 165 iha mundu, inkui nasaun 100-resin, hosi facilidade COVAX, no evidénsia sientifika ne’ebé revela katak, AstraZeneca (AZ) doze dahuluk iha efikásia média 71 % (51-83) no doze daruak 92% (75-97) efetivu. TL kontinua sente konfiante no seguru kona-bá desizaun atu administra AstraZeneca ba populasaun ho idade 18 ba leten, tuir rekomendasaun péritu OMS,” Odete Maria Freitas Belo, hateten ba jornalista-sira iha Palásiu Governu, kuarta ne’e.
OMS rekomenda katak, ba nasaun-sira ne’ebé iha transmisaun COVID-19, benefísiu vasina sei proteje hasoru COVID-19 no importante atu labele hetan risku.
Maibé, konsiente katak, nasaun idak-idak tenki konsidera situasaun nível risku epidemiolojia ba ema individu no populasaun, disponibilidade vasina ho alternativa vasina ne’ebé sai opsaun ba risku mitigasaun.
Hipóteze ba ema ne’ebé lakon vida hosi ‘Blood Corting’ ou laiha ne’e, baze ba índise Fatalidade iha Austrália 1 per 60 kazu.
Bazeia ba análize hosi NITAG no OMS, iha Timor-Leste, estimativa risku ema ho reasaun adversa grave ka kazu tromboembolicos tanba hetan vasina AstraZeneca limitadu teb-tebes (karik 21.3 ba millaun 1 populasaun) no risku ba mate.
Odete Belo, esplika populasaun Timor-Leste iha 143.502 mak simu ona vasina AstraZeneca, no to’o agora sei rejista 21 kazu ema hetan reasaun adverse, depois de simu vasina AstraZeneca, maibé maioria kaman la grave.
Ikus mai, Timor-Leste iha ai-moruk no espesialista ne’ebé treinadu atu jere kazu tromboembólicos, no hahú 27 maiu 2021, kazu COVID-19 hatudu redusaun signifikativu hosi loron ba loron tanba +45% populasaun munisípiu Dili simu ona doze dahuluk.
Tanba ne’e, Ministériu Saúde, hamutuk ho OMS, UNICEF, Embaixada Austrália no NITAG, rekoñese katak sistema nasionál farma kovijilánsia tenke haforsa akompañamentu kampaña vasina, ekipa vasinadór no profisionál saúde-sira iha fasilidades saúde hotu-hotu tenke hasai nível alerta, hodi deteta no notifika lalais suspeita reasaun adversa ba vasina.
Jornalista: Felicidade Ximenes
Editór: Cipriano Colo
